Zoram Thar Column: KAN RAMA NUPA IN|HEN TAMNA CHHAN HI ENGE?

Rev. Dr. Zaichhawna Hlawndo

Khawvêl changkânna leh hmasâwnna lamah Zofâten hma kan sawn nasa hle. Chutih rual chuan kan vantláng nun kalphung leh inkaihhruaina lam erawh chu ngaihtuahawm khawpin kan awm mék. Hmanlâi chuan lal leh upate rorêlna hnuaiah felfâi takin vantláng rorêlna kha kalpui a ni thin. Tunah chuan Zofâte vantláng nun inkaihhruainaah hian tunge thuneitû ber pawh a hriat loh. Sawrkâr (government) nge Kohhran (denomination) nge Young Mizo Association leh NGO pawl hrang hrang te tih pawh hriatthiam a har khawp mai. Tun tumah chuan kan rama nupa inthen tam lutukna chhan hi thuneitu bik leh rorelna mumal kan neih tawkloh vang a nih theih dan te ka rawn ziak ve dawn a ni.
India ram pum nupa inthen tam dan tehnaah India chu zaah pakhat 1% chiah a nih laiin, Mizoram chu zaah pali 4% kan ni daih a. Min hnaih bertu Nagaland pawh 0.88% chauh an ni. Kristian 100% a inchhâl ngam, missionary tir chhuak tam ber, inkhawm tam ber leh tawngtâi tam ber nia langte hi kan va mualpho chiang em! Engvanga heti taka nupa inthen kan tam uchuakna chhan hi chhui chhuah a, a mawhphurtuten a rang lama hmalâk a ngai tak zet zet a ni. Ka chhui ve dan leh hmuh dan tam tak karah thenkhatte leh siam that dan tur rawtna te ka sawi dawn a ni.
1. Kan ram hruaitu (politician) te hian vantlâng nun siamthatna (social reformation) an ngaihtuah tawk loh vang a ni.
State sawrkâr rorelna mumal tak kan neihna pawh kum 40 dawn a ni ta. Sawrkâr kan lo neih tawh leh neih mékte hian heti taka kan vantláng nun kehchhia hi mutmawh hnarmawhah an neih tawk loh vang a ni thei angem. Kan Assembly rorelnaah pawh helam thu hian sawi a la hlawh meuh lo chu a ni. Heti khawpa chhungkaw keh chhiatna leh hnam mualphona ngaihpawimawhna chang leh a siam that dan hria ram hruaitu kan la neih loh vang a ni thei ang em? Chhungkua ber a keh chhiat chuan khawtlang, ram leh hnamin a tuar lo thei lo. Chuvang chuan nupa inthen tam lutuk tihtâwp dan hi ram rorêlna dawhkan sang berah te hian ngaihtuah a hun hlein ka hria.
2. Nupa inthen theih lohna dan kan neih loh vang a ni.
Mizoramah nupaa insiamte nghet taka an inneihna tur leh inneih hnuah an inthen leh mai mai lohna tur dan mumal kan nei lo. Mizo Customary Law kan neih veah chuan inthen theih dan hrang hrang (1) Mâk (2) Sumchhuah (3) Peksachang (4) Sumlaitan leh (5) Tlan tihte kan nei. Heng inthen theihna hi a chhan leh vang mumal vak a awm a ngai chuang lo, engvang pawhin awlai takin a inthen theih. Mizo Customary Law ah inthen theih loh dan tlar khat pawh kan nei lo. Hnam danin man leh mual phuahchawp deuhvin kan inhlan a. Chumi zawhah Biak inah pastor ten kut suihin min inneihtir a, ‘Pathianin a zawm tawh chu mihringin then suh se’ tiin thuin min delhkilh a. Kohhran pawhin inthen theihna leh inneih leh theihna dan te kan siam a, inthen phal lohna dan erawhchu kan nei lo niin a lang. India ram state dangah chuan inneih an uluk ang bawkin inthen a hautak em em a, inthen mai mai theihlohna dan tha tak an nei. Zofate pawh hiam duh duha inthen theihna dan kan hman hi paihin inthen mai mai theihlohna dan – Zofate Kristian te Inneihna dan thar (Zofate Christian Marriage Act) hi a rang lama siam a ngai niin a lang.
3. Nupui pasal inzawn leh siam dan kan uluk loh vang a ni.
Kan pi leh pute khan nupui pasal inzawn dan kha an lo duhtui khawp mai. Nupa inthen pawh an tlem. Nu leh pate khan an fate nupui pasal neih tur chungchang kha thupuiah an nei a. Pasal nei rual emaw nupui nei rual an nih tawh chuan chhungkaw din thei turin an rilru leh ngaihtuahna an seng thin. Inngaizawnga inneite pawh an awm rualin inngaizawng hmasa lo, nu leh paten uluk taka an ngaihtuahpui leh remsiam atanga innei an tam. Nupui pasal inzawnah hian eng ang chhungkua nge an nih tih hi an dah pawimawh thin. Rukruk ching an ni em? Taima chhungkua an ni em? Natna inkaichhawn theih vei an ni em tih thlengin an inchhui thin. Zofate hian nupui pasal zawn hi kan pi leh puten an dah pawimawh angin, nu leh pa leh khawtlang leh kohhran thlengin kan dah pawimawh leh zual a ngai hlein ka hria.
4. Man leh mual tlem lutuk vang a ni.
Zofâten nupui pasal kan inneih dânah hian kan pi leh pute tih dânin man leh mualte kan siam ve a. Man zat turte bitukin man eitute kan siam ve bawk. Tuna kan tih dan tlângpuiah chuan hmeichhe man hi chêng zali, thutphah cheng sawmhnih te kan ti. Tichuan man eitute hnenah a lêt tam tak pawisa kan sem chhuak leh lawi si. He kan thiltih dan hi naupang inkhualtelem ang vel a ni. Hei hian inneihna kan ngaihhlut tawk lohzia a tichiang hle. Mipain inhlawhfaa ni khat hlawh aia tlemin nupui a nei thei tihna a ni. Inneih kan awlsam ang bawk khan inthen pawh kan awlsam phah niin a lang.
Kan pi leh pute dan chhawm nun tum siin an tih dan ang ni lovin kan kalpui. Man leh mual kha inlei nan ni lovin chhungkaw hnih inpumkhat leh inremna atana hman a ni. Man chhiar nan Sial hman thin a ni. Sial puitling hi cheng 40 a ni a, Sial puitling lo chu ‘Tlai’ cheng 20 hua ngaih a ni. Man leh mual chu Tlai 4-10 inkar a ni thin. Tunlai ‘Sial’ hlutna ang chuan nuai 2 atanga nuai 5 ang vel a ni ang. Chung chu man eitu chhungkuate hnena sem ral a ni. Man leh Mual kan pi leh puten an lo tih ang hi kalpui ve ila, nupui pasal inneih pawh kan ngaihlu ang a, nupa inthen mai mai a ti tlem ang. Man eitute tan pawh phurrit ni lovin man eiin awmzia a nei tawh ang. Zofate nun kehchhia siam tha tur hian kan mawhphurhna theuh ah tlan chhe lo ila, hma lam panin i pen zel ang u khai.