Karnataka Revenue department zirchiangin minister hoin chhuak

Karnataka Revenue department
zirchiangin minister hoin chhuak
Karnataka sawrkar hnuaia Revenue department kalphung zirchiangin Mizoram Land Revenue & Settlement minister B Lalchhanzova leh department hotute an thawkchhuak.
Nilaini khan Karnataka Revenue minister Krishna Byre Gowda chu a pisa-ah hmu in, state pahnih inlaichinna tichak tura thawhpuiah Mizoram minister hian a sawm a. Karnataka-ah, a bikin Bengaluru-ah Mizo thahnem tak an awm, tiin, a tul anga an thlavang lo hauh thin turin a ngen.
An sawrkar tirh atanga an lo ruahman tawh tih hlawhtlin a ni chu B Lalchhanzova hian lawmthu sawiin, Karnataka chu India ram state zinga land revenue administration nei tha leh technology thar hmang tangkai ber zing ami a nih anga tlawh an ni tih a sawi.
Minister leh official-te hi Revenue principal secretary Rajendra Kumar Kataria leh commissioner Sunil Kumar P hoin an lo dawngsawng a. October 23-26 chhungin Karnataka sawrkar hnuaia Revenue department kalphung leh tih dan tha hrang hrang zirpuiin field visit an neihpui a ni.
Mizoram Land Revenue department-a thawktuten theihtawp chhuah thin mah se, an set up leh kalphung a fuh tawk lo lai siamthat zel a tul tih B Lalchhanzova hian a sawi a. India rama helama a hmahruaitu Karnataka tlawh a pawimawh tih sawiin, Mizoram atanga kalten thil tha tam tak an zir chhuah theih a beisei tih a sawi a ni.
Minister hi Land Revenue & Settlement secretary Vanlalmawia leh official engemawzatin an tawiawm a ni.