Sa kaptu mi pahnih man

Sa kaptu mi pahnih man
Sa humhalh zing ami pahnih kaphlumtua puh mi pahnih chu an silai nen man an ni a, dan tlawhchhana thubuai siamsak an ni.
Environment Forest & CC department Aizawl Forest Division hotute atanga thudawn danin, Aibawk Forest Range thawktute leh YMA Sateek Branch chuan ramsa. sava kah a nih thu October 22 zan khan an dawng a. Hei hi bawhzuiin October 23 (Nilaini) khan ulhbun silai hmangin Vahrit (Kalij Pheasant) leh Zawbuang (Masked Palm Civet) an kap a, an tihlum nia puh mi pahnih – Vanlalhriata (35), Aibawk Venghlun leh HP Rodingliana Aibawk Salem Veng chu man an ni.
Wildlife (Protection) Act 1972 hnuaiah thubuai siamsak niin, chief judicial magistrate thupek angin Nilaini tlai khan Central Jail-a dahluh nghal an ni. An sa kah hi Wildlife (Protection) Act 1972 hnuaiah Schedule-I niin, thiamloh chantir an nih chuan kum 3 atanga kum 7 thleng lung in tan theihna leh sumfai Rs. 25000 chawitir emaw a pahnih emawa hrem theih an ni tih an sawi.