Eiruknaa hmingchhia kan awm lo – Dr Vanlalthlana
Eiruknaa hmingchhia kan awm lo
– Dr Vanlalthlana
ZPM sawrkarah tun thlengin eirukna laka hmingchhia an la awm lo tih minister Dr Vanlalthlana chuan a sawi.
Sinlung Hills Council inthlan tura campaign Dr Vanlalthlana chuan, ZPM-in corruption laka fihlim an intiam a, vawiin thlengin eirukna laka hmingchhia an awm lo tih a sawi. “Hei hi kan thutiama kan rinawmna lantirna a ni. Aikal lak titawp turin hma kan la a, a harsa khawp mai. Mite huat pawh kan hlawhin ka ring. Nimahse, ram tana tha turah chuan nghet takin kan ding zel dawn a, mipui pawhin min hriatthiampui kan beisei a ni,” a ti.
Eptu party-ten, ZPM chuan kan ti ang an tih an ti loa, kan ti loang an tih apiang an ti, tiin mipui rilru hruaikawi an tum tih a sawi a. Nimahse, kan ti ang an tih chu an ti chho mek a, vawi leh khata engkim tih nghal theih a ni lo, tiin, “Hun rei tak sawrkarna lo chang tawhten an tih theih loh kan ti chho mek a. Kan ti loang kan tih pawh kan ti lo khawp mai. Eirukna lakah fihlim zel kan tum tlat. Eptu party-te hi inenfiah se kan duh a, mipui rilru hruaikawi tuma polictics an khelhnaah thudik leh belhchian dawl hmang thin se kan duh,” a ti.
Sawrkarna an chan hnuah sawrkar hnathawk hlawh an theih chin chinah a hun takah an pe zel a, chutih laiin central scheme hnuaia thawktu hlawh chu an thuneihna piahlam a nih avangin duh huna pek theih loh chang a awm lo thei lo chu a changtu minister a nih ang pawhin pawi a ti takzet tih School Education minister hian a sawi a. Mid-day meal chungchangah pawh sawrkarin sum inpek dan kalphung a tihdanglam avangin harsatna an tawk a, reiloteah a kal dik leh thuai dawn tih a sawi a ni.
Sem policy hmanga hma la thintuten politics khelhnan NLUP leh SEDP an hmang thin a, an ni chuan mi taima leh tumruh, party bik sawi loin an thlang dawn a, mipui sawrkar an nihna lantir zel an tum tih a sawi bawk.
Tuialhthei man tihsanah mipuiin sawrkar ruahmanna an hrethiamin an pawm hlea an hriat chhan chu, heng chhiah lak hi mipui tana hman tur a nih vang a ni tih Dr Vanlalthlana hian a sawi a. Heti chunga thenkhatin nawrh an huaihawt chu thil ngaihtuah chian loh vang mai nia a lan thu a sawi.
SHC-a an candidate an vote tlin chuan, ruling party an ni thei dawn a, an aiawha ding tur leh khawtlang hmasawnna tur kawng hrang hrang ngaihtuah leh an harsatna pawh an tan an din sak dawn che u, tiin a sawi a ni.