Ram hruaitu hmasaten ram leh hnam rotling an hnutchhiah tam – Lalthansanga

Ram hruaitu hmasaten ram leh
hnam rotling an hnutchhiah tam
– Lalthansanga
Hruaitu hmasaten thil tha tam tak, ram leh hnam rotling engemawzat an hnutchhiah tawh tih minister Lalthansanga chuan a sawi a. Heng hruaitu hmasate hnung zui leh an hmachhawp chhunzawm zel chu an mawhphurhna a ni tih a sawi.
Sinlung Hills Council inthlana campaign-a kal Lalthansanga chuan, mipui nawlpui ram vei pha chin chuan kan ram dinhmun an thlirin, ram hruai tawhten an hruai danah duh khawp an hmu lo a ni maithei a, ZPM party lakah rinna leh beiseina sang tak neiin an kutah rorelna an hlan a, theihtawp an chhuah tih a sawi.
“Tihsual palh kan lo nei a nih pawhin kan tihsualah ngaihdam dil ngam tur leh tlawm ngam turin kan huaisen tur a ni. Hruaitu hmasate an zahawm hle a, thil tha tam tak, ram leh hnam rotling engemawzat an hnutchhiah tawh. Heng kan hruaitu hmasate hnung zui leh an hmachhawp chhunzawm zel hi kan mawhphurhna a ni,” a ti.
ZPM pawh engtik niah emaw chuan an tlak hun a awm ve anga, a pawimawh ber chu an ram leh hnam tana rotling hnutchhiah leh ram rorelnaa Pathian ram thlentir chu an tum ber a ni tih hrereng turin a chah tih Lalthansanga hian a sawi a ni.
ZPM party chu Pathian din nia sawiin, a din tirh dawn pawhin harsatna an tawk nasa em em a, Pathian ram ni loa mihring ram din tumna a awm apiangin hnuhhniamin an awm thin tih ZPM hruaitu hian a sawi.