Kawng chhiain eizawnna nghawng nasa

Online hmanga thil chah hi tunlaia bazar dan lar a ni a, rei lo te chhungin a thang chak hle. |henkhat phei chuan a theih chen chenah dawra lei lova online hmanga chah an duh a, hobby-a neih pawh an thahnem ang. Kawng chhiain hei hi a nghawng nasa a, heti lama eizawngte eizawnna pawh a nghawng nasa hle.
Online hmanga thil chah hi a sem kualtu an awm a, delivery assistant leh delivery boy/girl an awm. Kawng chhiain nghawng a neih danah anni hian hriat an hlawh lo mai thei a, mahse a nghawng nat pawl an ni hial ang.
Mi bungraw chah sem kualtu leh a hmuna petute hian an pek tam dan azirin hlawh an la a, tunlaia kawng chhiain Mizoram a tihbuai chhung hian hlawh nei mumal lovin an awm ngun tih thu dawn a ni.
Anmahni sawi danin, September thla atang tawh khan kawng chhiat vangin bungraw chah a thleng mumal lo a, sem tur leh pek tur an nei tlem. An nei tlem mai a ni lo a, chawlh tawp ni an ngah, a chang phei chuan chawlhkar khat te an chawl.
“Sem tur kan neih tlem chuan kan hlawh tlem a ni mai a, kan chawlh lai chuan hlawh kan nei lo a ni mai a,” delivery boy pakhat chuan a ti.
An buai thu a sawi a, mahse ban phah em chu an awm a hre lo. Amaherawhchu, an chawlh chhunga thil danga inhlawh a hriat nual thu a sawi.
Kawng chhiain an eizawnna a nghawng hun hi an tan a uiawm zual chhan a awm a, Diwali vanga thil man a tlawm lai, online-a thil chah an pun thin hun, sem tur a tam thin hun lai, an hlawh tam hun lai a ni.
October velah hian thil man to tham deuh deuh, za zela 50 te, chu aia tam te chuan a tlawm thin a, Mizoram atang pawhin thil chah an pung thin. Kuminah pawh thil chah an pung a, mahse a thleng meuh lo tih thu dawn a ni. Chu chu a semtute tan chuan thil uiawm tawp a tling.
“Kan hlawh tam thin hun a ni a, dik tak chuan khawl tur kan neih theih hun a ni a. Kumin hi chuan chu chu kan chan a,” delivery boy pakhat chuan a ti.
Courier service thenkhat chuan tun karah bungraw chah a thlen that tak deuh thu an sawi a, mahse a hma angin a mumal rih lo tih an sawi.
Tunlai hian in sakna bungrua thlengin online hmangin an chah a, hengte pawh hi a thlen loh avangin in sa laiteah harsatna tawk an awm thu courier service enkawltute’n an sawi a, in sakna bungrua chauh ni lovin thil dangah pawh chhungkaw hrang hrang, an bungraw chah a thlen loh avanga a nghawng an awm thu an sawi.