Sawrkarin midang kutah mini hydel project hlanchhawn tum – MPCC president

Sawrkarin midang kutah mini hydel project hlanchhawn tum – MPCC president
ZPM sawrkarin midang kuta Zoram Medical College leh Lengpui Airport hlan a tum hnu ah, sawrkar kal tawh ten mini hydel project chu midang kuta hlan a tum leh nia an hriat thu Congress president Lal Thanzara chuan a sawi.
Zirtawpnia Congress Bhavan-a inkhawma MPCC president chuan, Congress leh MNF sawrkarin Mizoram tan engmah ti lo nia sawitute an sawrkar a. An sawrkar tantirhah harsa taka Congress sawrkarin a din medical college chu enkawl theih loh chhuanlamin sawrkar laipui kuta pek an tum a. Central lamin puihbawm an tum avangin an hlan ta lo tih a sawi.
Congress sawrkar siam Lengpui Airport chu IAF kuta hlan an tum, tiin, “Airport khuan sum tam tak a thawkchhuak a, an sum hman dik loh leh hman heu thin vangin harsatna an tawk niin kan hria a, chuvangin airport hi hralh a, midang kuta hlan an tum a ni,” a ti.
An hriat danin, chief minister-in sumdawng hausa Kundan Green Private Ltd. atangin inleng a nei a. Chuta an sawi dun chu, sawrkar kal tawh Congress leh PC-ten mini hydel project an siam chu an enkawlsak anga, power siamchhuah thenkhat man loin state a pe anga, a bak chu state sawrkarin lei turin agreement an sign hnai nia sawi a ni, tih Lal Thanzara hian a sawi.
“Hengte hi department lam chuan an ui takzet a. Engmah ti loa min lo chhuah tawhtuten kan ram rohlu kan lo siam tawh chu enkawl thei lo leh thiam loin midang kuta hlan ringawt mai hi an tum a ni,” a ti.
Sinlung Hills Council inthlan tur campaign-in October 23 khan Education minister Dr Vanlalthlana chu Ratu bialah kalin, ZPM Group president Pu Lalrohlua’n Ratu khuaa sawrkar school zawng zawng chu public meeting-a kal turin lehkha in a sawm a, engemawzat an tel niin MPCC president hian a sawi. Minister ho hian school mamawh an sawiho nia an hriat thu a sawi bawk.
“Kalphung thar, mi tih dan lo anga kala dik taka tih tumte kal dan chu hetiang hi a ni. Hei hi minister leh sawrkar hnathawkten election model code of conduct an bawhchhiatna chiang tak a ni. Kan hriatsual loh chuan, he Council atan hian inthlan puan tawh hnu in cheng nuai 100 chuang sanction nia hriat a ni a, heng hi thil tih ngai loh, election code of conduct bawhchhiatna a ni,” a ti.
“Kan ram kal zel dan tur hi Congress party-in tihtakzeta kan ngaihtuah a ngai ta. Kan ram tluchhe mek, sum nei zawkte kuta kan ram rohlu hlan tuma hma an lak mek lai hian, theihtawp chhuah a ngai a ni,” Lal Thanzara hian a ti bawk.