Bum theih kan la tam hi…

Certificate siam thei nia intawktarh mi pakhat chu tun hnai khan Police-ten an man a. Certificate lem a siamte hi HSLC/HSSLC marksheet, HSLC Certificate, driving license, Mizoram University Grade Card etc. te a ni.
Han en vang vang hian, certificate lem a siamte hi sawrkar department office atang lo chuan lakchhuah theih loh thilte a ni hlawm a, chuti chung chuan a customer-te hi lehkhathiam, mi vengva chin, hetianga mimalin social media kaltlanga a post te chu rintlak a ni lovang tih hrethiam rual tur thiau an ni a; mahse, an hre lo miau a, bumin an awm thei tlat. Thil dik lo titu hi a dik lo, dan kalh thil a ti a, hrem theih a ni; chutih rualin lehkhathiam rual hetianga bum theiha awmte dinhmun hian ngaihtuahna a kal thuitir khawp mai.
Tun hnaiah, scholarship form fill up thiam lo zirlai an tam thu leh, internet an khawih nasat ang huin, thil pawimawh leh tangkai thilah online-a thil tih ngai an thiam leh si lo a, tih tarlan a ni a. Hei hi kan dinhmun a nih chuan, state pawn lama hna thawk tura thalai lehkhathiam rual an chhuak hum hum lo te hi kan lo hetih vang te hi a ni ang e tih mai awl tak a ni ta.
Certificate lem siam thei an awm a, an siam a, manchhuah an nih bawk si chuan, hna lak thilah reng reng certificate a dik leh dik loh rang taka enfiah zung zung theihna tur hi kan mamawh hle tihna a ni a. Thawkkhat lai khan, dentist pakhat chu certificate lem hmangin hna a thawk tih tlai khaw hnuah hriatchhuah leh hnuhnawh a ni a. Kha’ngte pawh kha, certificate enfiah that a nih loh vanga thil thleng thei a ni a. Chu chuan certificate hman duhna rilru a chawk tho ve thei a, chu chuan dik lo a hring chhuak ta zel mai tihna a ni.
A lem siam thiam an lo awm a nih pawhin, a lem leh a tak thlair hran kawngah system tha tak kan neih a pawimawh tih a lo lang leh ta a ni ber e.
Hetih rual hian, zirlai pawl sang tak tak chin pawh bum theihin an awm kan tih rual hian, nu leh paten kan fate thiltih dan kan hriatpui lo lutuk deuh a ni lo maw a tih theih bawk awm e; tanrual kan mamawh hle niin a lang.