Mipui tan sawrkar inchhawp hnai

Mipui tan sawrkar inchhawp hnai
Mipui hnen thleng phaka sawrkar department hrang hrangin hna an thawh theihna turin Thenzawl Civil Sub-Division Office ruahmannain ‘Fehchhuah Programme’ vawikhatna chu Nilaini atang khan Buangpuiah neih tan a ni.
Fehchhuah Programme-ah hian Vety Farm Thenzawl general manager Dr Ch Lalthafamkima chuan vawk natna hrileng – ASF chungchanga ran vulhtute hriat tur a sawi a. Thenzawl Police Station officer in-charge Lalzidinga Kawlni chuan criminal law thar pathum nihphung leh dan leh thupek chungchanga mipui hriat tur a sawi. Apex Bank, Thenzawl manager Lalsiamthara chuan sum vawn dan leh peipun dan – financial literacy campaign hun a hmang bawk.
Chawhnu lamah Community Health Centre Thenzawl leh Integrated Ayush Hospital Thenzawl chuan mipui tan a thlawna inentirna – health camp an buatsaih a. SDO(C) office bakah Apex Bank Thenzawl-in ‘help desk’ buatsaihin, mipuiin awlsam taka an dawr nghal theih turin an inchhawpchhuak a ni.
He programme hi Thenzawl Civil Sub-Division huamchhunga mipui hnen thleng phaka department hrang hrangten hna an thawh theihnan leh department awm chhan mipuiin an hriat theihna tura ruahman a ni a, buatsaih zel tum a ni. Mipui tan ‘common platform’ siam thin tum niin, heng hunah hian department hrang hrangten scheme awmsa leh programme an kalpui mek an sawizau thin dawn a. Thlatin chawlhkar hnuhnung berah bial chhung khua/veng pakhat thlan bikah VC-te nen kalpui thin tum a ni.