Mipuiin awlsam zawka Land Revenue & Settlement department an dawr theihna tur online service portal, e-ram tia vuah (Development of Comprehensive & Integrated GIS based System for Maintenance and Management of Land Records in Mizoram portal) chu Thawhlehni khan chief minister Lalduhoma’n a hawng. e-ram portal hi sawrkar laipui Ministry of DoNER Science & Technology Section fund cheng vaibelchhe 6.4 atanga thawh niin, a bultanna atan pilot project angin Aizawl district hnuaia land records leh process kalpui phawt a ni ang. In hmun dilna, periodical patta, land lease, house site leh hming thlaktea bul tan a ni anga; a tahtawlin Revenue department service 27 chu he portal-ah hian bilh tel vek tum a ni. A portal address chu – eram.mizoram.gov.in a ni a, a hmang thiam lo tan Common Service Centre kaltlanga hman theih a ni.
Sawrkar leh mipui inkara indawrna awlsam zawk, hun leh tha heh lo zawk, rang leh huapzo zawk neih an duh a, chu chu kalphung thar mipui sawrkar zia a ni tih chief minister hian a sawi a. Sawrkarna an chelh ni ah Right to Public Services Act chu tha zawka kalpui tur leh chumi kaltlanga service tam zawk pe turin an intiam a. Ni za chhungin an tihlawhtling tih a sawi.
“Tunhmaa house pass dil apiangin Revenue minister dawhkan a paltlang ngai thin kha tihtawp a ni a. Aizawl District Settlement Office chu mipui mamawhna avangin Aizawl North leh South ah then a ni dawn a; revenue thubuai tam takte rang zawka ngaihtuahtu tur Revenue Court kan siam dawn a, surveyor indaih lohna avanga kan harsatna sutkian nan empanel survey firm system kan kalpui a. Hengte hi notification tihchhuah vek tawh an ni,” chief minister hian a ti.
Land Revenue & Settlement minister B Lalchhanzova chuan he hmalakna hi ministry hmasain bul a lo tan tawh a ni a. An theih ang angin an umzui a, siamthat chhoh zel ngai tam tak a la awm ang tih hre chungin an hawng ta phawt tih a sawi a ni.
Online-a Revenue department dawr theihna tur hman theih ta
Get real time updates directly on you device, subscribe now.
Prev Post