Land record hlui ho computerise vek dawn

Land record hlui ho computerise vek dawn
Land Revenue & Settlement department chuan land record an neih zawng zawng chu computerise vek an tum.
Thawhlehni khan an minister B Lalchhanzova hoin department hmalakna hrang hrang thlirletin Land Revenue & Settlement hotute an thukhawm a. Department-in mipui tana thil a awlsam zawknan leh kalphung tha zawk an neih theihnana department official-ten hma an la thin chu lawmawm a tih thu minister hian a sawi a. Hmalakna chu thlirleta sawiho fo tha a tih thu a sawi.
District zawng zawnga Land Record computerisation kalpui mek leh Record of Rights digitisation kalpui mek chu sawiho a ni a. Thlen chin leh hmabak hrang hrang sawi a ni. Mizorama Land record zawng zawng hi computerise vek bakah record awmsa pawh scan vek turin LR&S department hian hma a la mek.
Central sector scheme kalpui mek, Digital India Land Record Modernisation Programme (DILRMP) leh Survey of Village and Mapping with Improvised Technology in Village Areas (SVAMITVA) hnuaia hmalakna sawiho a ni bawk. DILRMP hnuaiah hian land record tichangtlunga computerise turin district hrang hrangah hna kalpui a ni a. SVAMITVA hnuaiah hian khaw 319 survey tura kalpui niin, Mamit district-ah drone hmangin survey neih mek a ni.
Kumin October 23-26 chhunga Karnataka sawrkara Revenue administration kalphung zirchianga minister, secretary leh officer rual zin report ngaihthlak a ni a. State changtlung zawk tih dan tha Mizorama kalpui ve theih tur an zir chhuah chu a theih ang leh remchang thei tur zirchiang a, administration kalphung changtlung zawk neih theihna tura a tul anga bawhzui dan tur sawiho a ni bawk.