Real Madrid leh City an tlawm

November 5, Thawhleh zan khan UEFA Champions League khelh chhunzawm a ni a, inlehthalna lian pahnih a thleng. Champion lai Real Madrid chu an mikhual AC Milan hneh lovin an tlawm a. Champion tura rinkai zinga mi Manchester City chu Sporting Lisbon hneh lovin an tlawm ve bawk. Team liam pahnih an tlawm lai hian Juventus chuan tlawm an pumpelh ve thung.
Real Mdrid 1-3 Milan
Champions League a chetha thei tak, champion lai ni mek Real Madrid chuan Santiago Bernabeu-ah Italian Serie A club lian AC Milan an mikhual. An mualah chak tura ngaih ni bawk mah se an khel tha lo viau a, 3-1 ngawtin tlawm zawkah an tang. UCL a vawk lal len Real Madrid hian UCL season tharah vawi li an khel tawh a, tlawm zawkah vawi hnih an tang der tawh.
Santiago Bernabeu-a lenglut AC Milan hian rin phak bakin bul an tan tha a, goal pawh an thun thuai, Inkhel tan atanga minute 12-na lekah Malick Thiaw chuan hmahruaina goal a thun. Hma takah goal an thun vangin Milan hi phur viau mah se an phur rei lova, penalty an chawi thuai. Ballon d’Or dawng ta lo Vinícius Júnior chuan minute 23-naah penalty pet goal in an si phurh a sut.
Hma takah goal hnih an luh hnuin inkhel a hmuhnawm zui viau a, mikhual team an huangtau zui ta viau thung. Chawlhlawk dawn hnaih minute 39-naah Álvaro Morata chuan Milan goal hnihna a thun zui leh ta mai a, Serie A club lian hian 2-1 a hmahruai chungin chawlhlawk an hmang.
Chawlhlawk hnu lamah Real Madrid in an si phurh sut tum viau mah se an sut thei lova, goal an chhuah belh ta hlauh zawk. Hun tawp dawn hnaih lam minute 73-naah Tijjani Reijnders chuan Milan goal thumna a thun a, an hmahruaina a tizau. Reijinder goal thun hnu hian goal dang a luh belh thei tawh lova, AC Milan chuan inlehthalna lian thlentiriin champion lai Real Madrid chu an mahni khelmualah ngei 3-1 in a hneh a, point thum hlu tak an hmu.
Real Madrid hnehtu AC Milan hian vawi li an khel tawh a, vawi hnih chakin, tlawm zawkah vawi hnih an tang tawh bawk. An hneh tak Los Blancos nen hian point 6 ve ve an hmu a, a hniam zawkah an la awm tho thung.
City an buai?
English club lian, player tha tak tak kawl khawmtu Manchester City an buai a, kar khat chhungin vawi thum ngawt an tlawm hman. City hi thawhleh zan khan an hneh ngei tura ngaih Sporting Lisbon lakah 4-1 ngawtin an tlawm.
Tottenham leh AFC Bournemouth laka tlawm zawn City hi Portuguese club lian Sporting Lisbon hmachhawn turin Estádio José Alvalade-ah an leng lut. An len luhna mualah bul an tan tha viau a, inkhel tan atanga minute lina lekah Phil Foden hmangin goal an thun. Hma taka goal an thun hian mualneitu an chhaihkawlh a, goal li ngawt an chhuah zui ta hial a ni.
Team lian lakah goal an chhuah hnuin Sporting in team huaisen an nihzia an lantir a, an mikhualte an nawr zui nasa hle. EPL club te pawhin an hmuhtaih em em Viktor Gyökeres chuan minute 38-naah goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Sporting an khel tha viau a, goal thum ngawt an thun belh. Second half tan atanga minute khatna lekah Maximiliano Araújo chuan hma an hruai letna goal a thun. Second half tantirh teah goal an chhuah vangin City an buai. City talbuai lai chuin mualneitu lamin an nawr zui leh chiam a,Maximiliano Araújo chuan minute 49-naah an goal thumna a thun zui leh zat a, an hmahruaina a tizau. Hun rei tak 3-1 a hma an hruai hnuin goal hnih thun tawh Gyokeres chuan minute 80-naah penalty a pet goal zui leh a, hattrick a siam. Goal thun mamawh viau mah se City in goal an thun belh thei tawh lova, rin loh takin Sporting Lisbon lakah an mualpho ta a ni.
An mualah ngei Manchester City an hneh tum hi Manchester United manager ni mai tur Ruben Amorim-a’n an muala Sporting a kaihhruai hnuhnung ber tur a ni tawh a. Team lian City sawp chung ngeia a tawp a khar hi a hlu bik hle ngei dawn a. A player te pawhin an thiam ang tawkin an manager hlui ni mai tur Amorim hi zahna leh chawimawina an lantir ve bawk. City hnehtu Sporting hian UCL season tharah vawi li khel tawhin tlawm an la nei lova, point 10 hmuin pahnihnaah an awm mek a. An chungah vawi li chak zawn Liverpool an awm. City hian khelh li atangin point 7 an hmu a, paruknaah an awm ve mek bawk.
Juventus chhantu Vlahovic
Thawhleh zana inkhel dangah Italian Serie A club lian Juventus chu Lille hneh lovin an tlawm teuh hle a, Dusan Vlahovic penalty pet goal hmangin an si phurh an sut thei hram. Mualneitu Lille tan hian Jonathan David chuan minute 27-na lekah hmahruaina goal a thun a. Hun rei tak hnufual zawk an nih hnuin Serbia forward Vlahovic chuan minute 60-naah penalty atangin an si phurh a sut thei hram a, tlawm an pumpelh ta hlauh a ni.