Asia champion Lalruattluanga’n bike a dawng
October 19-27, 2024 chhunga Aurika Skycity Hotel, Mumbai-a khelh zawh tak 2024 Asian Arm Wrestling International Cup men’s seniors 80kg right category-a India tana gold medal dawngtu, ITI veng tlangval Denic Lalruattluanga chu amah duhsaka ngaisangtu intelkhawmte’n whatsapp group an siam kaltlanga an thawhkhawm sum atangin cheng nuai hnih chuang man bike an leisak.
He bike thar hi Aizawla Royal Enfield bike zuartu Lawma Enfield dawr atanga lakchhuah niin, dawrneitute hian Mizo tlangval chu an chhuanzia leh lawmpuizia lantirna’n an discount bakah Royal Enfield merchandise an ‘present’ tel bawk.
Asia khawmualpui champion nungchang tlawm leh inphahhniam tak hian a hretute rilru a hneh viau thin a; Mumbai atanga a lo haw hlim khan a mobile phone hman that tawk lohzia an hmuhin amah lainattute’n thawhkhawma a thar leisak a tum mek lai pawhin hmun dang atanga phone thar a dawn tur thu leh amah duhsaktute’n sum an lo thawhkhawm tawh si a nih chuan TNT-ah emaw tar chawmnaah emaw pek a rem leh rem loh a lo zawtlet tawh a ni.
2024 Asian Arm Wrestling International Cup-ah khan a match hmasaberah Kazakh puller Islam Nurmanov hneh lo zet mah se tournament a khelh chhungin Nurmanov-a panna lai a zirchhuak hman a, final-ah Kazakh banelh chak hi a hnehlet ngat a ni.
A khelh dan hmang (technique) avanga phaitual media lamin ‘Strap Man’ tia hminglem an phuahsak Denic Lalruattluanga thlalak hi amah ngaisang leh duhsaktute’n Aizawla Millenium Centre bang hmalam langsar laiah lianpuiin an tarsak nghe nghe.
2024 Asian Arm Wrestling International Cup-ah khan a thlengtu India chu overall team standing-ah pahnihna niin, India kuta medal 223 lut zinga 63 chu gold niin, silver 100 leh bronze medal 60 a tel bawk.
Khawvela banelh chak ram hriat hlawh Kazakhstan chu team champion an ni leh.
Asia champion Lalruattluanga’n bike a dawng
Get real time updates directly on you device, subscribe now.
Next Post