Thlai chingtute chhiarkawp…

Kar kaltaa chief minister-in minister of state Prof. Lalnilawma enkawl department pathum hnathawh dan a thlirpuinaah, horticulture department hnuaia loneitute thlai tharchhuah dan tarlan a ni a; mahse, thlai tharchhuahah eng hmasawnna nge awm tih te, loneituten an hamthatpui dan eng nge tihte leh, a kaihhnawih hrang hrang (detail statistics) tarlan a ni ta chiah lo a, mipui hriat tura chipchiar deuh zawka tarlan theih a duhawm hle a ni.
Horticulture department hnuaiah nikum chhung khan Dragonfruit atangin cheng vbch 6.96; Balhla- vbch 4.17; Lakhuihthei – vbch 2.52; Tomato – vbch 5.74; Dawnfawh – vbch 3.49 leh Zikhlum vbch 6.57 tharchhuah a ni.
Heng thlai leh thei chingtu chhungkaw zat hi mipui lam chuan kan hriat ve miau loh avangin, thlai/thei tharchhuah hi nikum aiin a tam nge a tlem tih te, engtiangin nge an hlawkpui tihte chu a tlangpui tal pawh chhût chhuah theih a ni lo.
Mizoramah Balhla chingtu hi an thahnem hle a, a tlem lama chhutin chhungkua 200 lo ni ta se, kum khat chhunga tharchhuah zat hi 200-in sem ila, kum khat chhunga chhungkaw pakhatin Balhla atanga sum a lakluh zat (vbch 4.17=Nuai 417) chu chawhrualin Rs. 2,08,500 a ni. Thlakhat chhunga an thawhchhuah chu chawhrualin Rs. 17,375 tihna a ni bawk. Hei hi thlai chingtu chhungkua pakhatin kum khat chhunga sum a lakluh zat a nih chuan, tanlakna tur hi a la tam hle tih a lang.
Mizoramah Balhla chingtu hi chhungkaw 200 lek chu an ni dawn lo tih a lang chiang sa a. Balhla chingtu chhungkua zawng zawngin an lakluh zat hi horticulture department-ah an report vek kher lo maithei bawk.
Balhla ang bawkin item dangte pawh hi a mal te tein han chhut dawn ila, data kan neih chhun chu kum khat chhunga tharchhuah zat a ni tlawng mai a, thlai tharchhuah lamah eng hmasawnna nge awm? Thlai/thei chingtuten an hlawkpui em? Engtia hmalak chhunzawm nge tha ang? tih chu Review Meeting-a chai chhunzawm tur niawm tak a ni a. Chuti ni loa, Data kim lo zet tarlan hi review kan kalpui dan a nih chuan, thlai chingtute chhiarkawp hi a chawh dik theih dawn loh a, thlai chingtuten pass mark pawh an hmu dawn lo tihna a ni; inenfiahna tur a la tam hle tihna a ni ang.