CYMA-in HM hnenah thlen

CYMA-in HM hnenah thlen
Central YMA chuan raltlan kaihhnawih leh thuil pawimawh dang chu Home minister K Sapdanga hnenah an thlen.
Thawhtanni khan Central YMA hruaitute hian an president Lalhmachhuana hoin K Sapdanga an hmu a. Disaster Management & Rehabilitation minister ni bawk hnenah hian tunhnaia YMA Sub-Hqrs. Champhai huamchhunga Myanmar raltlante khawsakna in (house) chu, sawrkarin an hman a tul dawn avangin relief camp thar sakna tur DM&R department senso tur sum an dilna lehkha an thehlut a, minister hian tul leh tha a tih thu sawiin, a rang thei ang bera hma lak dan tur Committee koh a nih tur thu a lo hrilh.
Myanmar buai avanga Zohnahthlak raltlan engemawzat, Manipur Jail-a hren mekte chu Mizorama lak chhawn theih dan kawng dap tura Central YMA ngenna chu police hotute nen hmalak dan tur an lo sawiho tur thuin a lo chhang a ni.
Central YMA-in village profile apps an siamtir chungchang an sawihoa, Home minister hian senso ngai belh tur a awm a nih pawhin a rang thei ang bera hman theiha peih nise, tiin a lo hrilh.
Central YMA hruaitute hian Home minister hnenah tunhnaia zirlai pawl pakhat hruaitu man an awm chungchangah dan chunga leng tumah kan awm loh rualin, he thil thleng avanga Mizorama zirlai pawl leh hruaitute inkarah leh sawrkar lam nena inkarah pawh boruak tha lo awm lo tura ram leh hnam ngaihtuahna fim tak nena kalpui tul an tih thu an thlen bawk.