Serchhip district pakhatna nih lawm

Serchhip district pakhatna nih lawm
Mizoram Tourism department buatsaih, district bawrhsap pisa tin inelna – Tour Itinerary Creation Competition-a pakahtna Serchhip district chuan bawrhsap Paul L Khuma hoin Thawhtanni khan an lawmman dawn an lawm.
Pakhatna an ni chu bawrhsap pisa chauh ni lo, Serchhip district mipui tan a ni tih Paul L Khuma hian a sawi a. An district chuan khualzinmi hip turin hmunhma a nei tha a, ami chengten ngaia an lo neih thil tam tak hi state pawn atanga khualzin lokalte tan chuan thil mawi leh hmuhnawm a tling tih a sawi a ni.
Heng hi an tihlar thiam a, khualzin lokal apiang an lo dawnsawn that a, lokal nawn an chakna tura an duat thiam a pawimawh tih a sawi bawk.
He huna tel Tourism hotute sawi danin, sawrkar laipui Ministry of DoNER hnuaiah ‘global model site’ atan Thenzawl thlan a ni tih an sawi a ni. Mizoram Aero-Sports Association hotute pawhin Serchhipa International Paragliding Accuracy Championship neih tur leh paragliding kaihhnawiha Serchhip-in tourism potential a neih that zia an sawizau a ni.