Central scheme hna zawh tawh ho Central Team endik tir tum

Central scheme hna zawh tawh
ho Central Team endik tir tum
Sawrkar laipuiin scheme a siam hmanga ram leh mipui tana hmasawnna tur hna thawh zinga zawh tawh nia sawi chu Central Team-in a endik leh phawt hma chuan zoah an pawm ve lo tih minister of state for Housing & Urban Affairs Tokhan Sahu chuan a sawi.
Zan khat riaka Mizoram tlawhtu MoS for Housing & Urban Affairs hian Nilaini khan Aizawlah UD&PA department hotute kawmin Aizawl Smart City Ltd. project, Swachh Bharat Mission-Urban, AMRUT, PMAY-U, JJM leh DAY-NULM a hmalakna an sawiho.
Official-te nen an thutkhawm hnua thuthar thehdarhtute a kawmnaah MoS for HUA hian, sawrkar laipuiin hmasawnna atan state sawrkara sum an pek tur ang ang a pe tawh a; state sawrkarin he sum hi a nihna anga an hman loh vang nge, mipuiin harsatna an tawk mek nia a lan thu a sawi a. Central scheme hrang hrang hlawhtlinna endik turin Central Team rawn tirh a nih tur thu a sawi.
PMAY- Urban ‘in sak tanpuina’ la dawng kim lo an awm leh a hlawhtlinna zaa 30 chauh a la ni chu a ngaimawh tih a sawi a. 1st instalment chauh dawng leh dawng tura tih la dawng si lo, chenna in lo thiat tawhte chu sawrkarin ngaihven turin a chah tih a sawi a ni.
‘Nal Se Jal’ hnuaiah khawpui chhunga tui hnianghnar taka pek chu sawrkar laipui tum leh a duh a ni a. Mizoram sawrkarin an thlen chin report a pe mumal thei lo nia sawiin, mak a tih thu a sawi.
Scheme kal mek kalpui that a nih loh a, hun tiam chhunga zo lo chu fund pek chhunzawm zel a harsat theih thu a sawi bawk.
Laldenga Cultural Centre sak tur chungchangah Union Home minister Amit Shah-a’n lungphum a phum tawh, Smart City Project hnuaia pek tura tih chu bawhzui zel a ni em, tih zawhna chu engmah a hriatpui loh thu leh lo enfiah a tum thu a sawi a ni.

8 Sawrkar official-te nen an thutkhawmnaah minister of state hian Aizawl Smart City Ltd. hnuaia project chu nakum March ralhmaa zo hman ngei turin a chah a. Project zawh tawhte pawh tha taka mipui hriat theih tur leh an hman tangkai theihna turin branding lam leh a puanzar lamah nasa zawka hma la turin a chah.
8 Hmasawnna lama master plan siam chu hmathlir thui tak, kum 20 lokal tur thlir chunga ruahman a duh tih sawiin, SBM hnuaia IHHL (ek in) sak chu a scheme a zawh ruala tawp mai loin, mipuiin an tangkaipui theihnan hma la zel turin a chah bawk.
8 UD&PA minister K Sapdanga chuan Cyclone Remal-in Amrut 2.0 hnuaia project a tih chhiat chu a thara siamthatna pe tura ngenin, second instalment pechhuak thuai turin Union MoS hi a ngen.
8 Aizawl Smart City Ltd. hnuaiah project 49 atanga project 28 zawh a nih tawh thu sawiin, project 22 chu 2025 March 31-a zawh tum a ni a, project 5 erawh March hnulama zawh hman bisei a ni tih a sawi.
8 MoS for HUA hian Ningani khan haw tura Lengpui Airport a panna kawngah AMRUT hnuaia Tennis Court Junction leh Raj Bhavan fencing, Aizawl Smart City hnuaia Aizawl Lungdawh, “Smart Street” bakah PMAY-U hnuaia Rangvamual leh Phunchawnga in sakte tlawhin beneficiary-te a kawm.