District tinah hlawhtling takin chhiatna hmachhawn dan entir

District tinah hlawhtling takin
chhiatna hmachhawn dan entir
National leh State Disaster Management Authority hmalaknaa District Disaster Management Authority (DDMA) tin ten tuilian, leimin leh kangmei a lo thlen thulha chet lak dan tur a tak ang bera an entir chu Ningani khan district tinah hlawhtling taka neih a ni.
District-ah chuan DDMA chairman, bawrghsap-ten District Emergency Operation Centre (DEOC) theuh atangin an vil a. DDMA chetlak dan hi State Emergency Operation Centre (SEOC), DM&R office Chawnpui atangin NDMA senior consultant leh coordinator Brig. Ravinder Gurung (Rtd.) leh Incident Response Sytem (IRS), emergency thila department officer senior-ten an vil a ni.
Chhiatrupna thlenna hmunah hian incident commander (IC) hona hnuaiah State Disaster Response (SDRF) Team, NGO leh chhanchhuah hna thawktuten zawnchhuah leh chhanchhuah hna a tak ang thei berin an kalpui a. Tun tum mock exercise-ah hian DDMA leh district IRS zawng zawng hi coordinator leh State IRS nen tha takin an inbe pawp a ni.
State level mock exercise atan hian hmun 47 thlan a ni a. Heng hmunah hian tuilian, kangmei chhuak leh leimin avangin kawngpui a chhia a, hospital-ah kangmei a chhuak a, lei dawh a chim a, ram kang leh chenna in chim awmin, nunna chan leh hliam tuar tam tak an awm bakah harsatna thleng thei dang pawh entir niin zawnchhuah, chhanchhuah leh siamthat hna kalpui dan tur entir a ni.
State EOC hi DM&R principal secretary hlui PC Lallawmsanga, IPS (Rtd) leh DM&R director hlui leh UNDP consultant Dominic Lalhmangaiha te chu obrserver atan ruat an nih angin an thutchilh bawk.