Ruihhlo vanga nunna chan 60 tling tawh

Ruihhlovin Mizoram a tibuai a, vanduaithlak takin nunna chan zat pawh a pung; kuminah mi 60 chuangin ruihhlo vangin nunna an chan tawh.
Mizoram Excise & Narcotics (MEN) department-in an chhinchhiah danin, kuminah ruihhlo vangin mi 61-in nunna an chan tawh a, an vanduainaah hian heroin a tel deuh zel.
An chhinchhiahnaa a lan danin, ruihhlo vanga nunna chan hi mipa 53 leh hmeichhia pariat an ni a, kum 19 leh kum 52 inkar an ni.
An zinga mi 34 chu heroin vanga vanduai an ni a, mi dang 27 chu heroin leh damdawi ruihhlo chi dang vanga vanduai an ni. Mi pahnihte vanduainaah heroin a tel lo, pakhat chu alprazolam leh damdawi ruihhlo chi dang vanga vanduai a ni a, pakhat dang chu khuh damdawi leh ganja vanga vanduai a ni.
2021-ah khan ruihhlo vangin mi 47-in nunna an chan a, 2022-ah mi 43-in nunna an chan. Kumin thla 10 chhunga nunna chan zat hi 2021 kum tluan leh 2022 kum tluana nunna chan zat aiin a tam. 2023-ah khan mi 76-in nunna an chan.
MEN department hian 1984 atangin ruihhlo vanga nunna chan zat hi an chhinchhiah a, 2024 thlengin mi 1873-in ruihhlo vangin nunna an chan tawh tiin an chhinchhiah; mipa 1648 leh hmeichhia 225 an ni.