Mizoram sawrkar a ngawi hi a demawm – MNF Thalai

Mizoram sawrkar a ngawi
hi a demawm – MNF Thalai
Tunhnaia Manipur-a Zofate chunga thil thleng chungchangah Mizoram sawrkarin an thlavang hauh zawnga chet a la lo leh a ngawi tlat mai chu an dem tih MNF Thalai chuan an sawi.
MNF Thalai Hqrs. thuchhuak chuan, tunhnaiah Manipur-ah Zosangkimi Hmar chu rawng taka thah a ni a. Thah a nih dan leh a chhan chu hnam issue ngei a ni, tiin, hemi hnua Zofa unau 10, hnam venghim tura an chetnaah bum niin rawng taka thah an ni leh a. Silchar-a an ruang postmortem-ah pawh kalphung pangngai pelin Manipur sawrkarin doctor-te lakah harsatna an siam nia a lan thu a sawi.
Hetianga rawng taka inthahna hi a dem bakah thuneihna hmangsuala Manipur sawrkar chet dan pawh a dem tih a sawi a ni.
‘Heti taka rapthlak thihna leh diriamna kan unauten an tawrh lai a, Mizoram sawrkar a ngawi tlat hi demawm kan ti a. Chief minister tan BJP sawrkar dem zawnga tawngchhuah a rem lo a nih pawhin, Home minister tal tawngchhuak ve se. Home minister hian MLA inthlan dawn khan Manipur-a kan hnampuiten harsatna an tawh chuan a hmunah an kalchilh tur thu a puang a, thla 10 chuang an sawrkar chhungin engmah an ti leh si lo hi a demawm a ni,’ thuchhuah chuan a ti.
MNF Thalai chuan rawng taka Zosangkim thah a ni chu an dem a, hnam pasalthaten hnam chhan nana an nunna an hlan chu ropui an tiin, an theih chin chinah Manipur leh khawvel hmun danga Zofate harsatna tawkte tanpui turin tan an la zel dawn tih a sawi a ni.