Thatna lam insawi uar turin fuih

Thatna lam insawi uar turin fuih
Thalaite an thatna lam ni lo, an chhiatna lam kan sawi nasa lutuk chu kan thatpui lo tih MNF hruaitu Lalruatkima chuan a sawi.
19th All Mizoram Karate Association (AMKA) Championship 2024 hawnna a hmanpuinaah Lalruatkima chuan, Mizo thalaite infiamna kawng hrang hranga hma kan sawn mek zel hmuhin a lawmawm tih a sawi a. Infiamna chuan discipline a kengtel a, ruihhlo, zu leh zuk leh hmuam laka insum ringawt pawh a hlu takzet tih a sawi.
“Kan ram thalaite an thatna lai ni lo, an chhiatna lam kan sawi nasa a. Hei hi kan thatpui lo. Kan thatna lam insawi sakin infuih phur ila a tha zawk em em a ni,” a ti.
Tunlaiah insualrawn a hluar ta chu pawi a tih thu MNF treasurer hian sawiin, infiammi thalaite chu midang thlamuantu, venghimtu ni zawk turin a chah.
19th AMKA Championship 2024-ah hian district hrang hrang atangin infiammi thahnem tak an tel a ni.