District tinah central scheme thar PM-DAJGUA tlangzarh

Sawrkar laipui scheme ruahman thar, Prime Minister Dharti AAba Janjatiya Gram Utkarsh Abhiyan (PM-DAJGUA) chu Zirtawpni khan Mizoram district tinah tlangzarh a ni.Aizawla hawnnaah chief secretary H Lalengmawia chuan hmasawnna rualkhai siam tura sawrkar laipuiin thingtlang khua ngaihpawimawhna tur scheme thar a duan chu scheme awmsa engemawzat chak lehzuala kalpuina tura tih a nih avangin state, district leh block level-a sawrkara mawhphurhna neite inkarah thawhhona leh tanrualna tha neih a pawimawh tih a sawi.
“He scheme hi a nihna tur taka hman a nih theihnan leh hlawhtling taka kalpui a nih theihnan kawng hrang hranga mawhphurhna changtuten uluk taka zirchiang ila, Mizoram tan hmasawnna tluantling thlentu hmanraw tangkaiah hmang ang u,” a ti.
Mizorama he scheme hawnna hmanpuitu, Ministry of Panchayati Raj joint secretary Rajesh Kumar Singh chuan India ram tihmasawn turin a chhunga khaw hrang hrangah hmasawnna rualkhai a awm a pawimawh a. Chumi atan chuan PM DAJ-GUA scheme hi hmanraw tangkai tak a ni dawn tih a sawi a ni.
PM DAJ-GUA scheme hi kum 5 chhung kalpui tur a ni a; India rama thingtlang khua 63843 tuam tura duan a ni. Mizorama khua 383 a tuam tel dawn a ni. India ram puma scheme kalpuina atan hian cheng vaibelchhe 79156 ruahman a ni a; hmasawnna kalpui tur a huam hrang hrang zingah – hmasawnna ruangam thar bun, thingtlang khawsak dinhmun chawikan, zirna leh mipui hriselna tihhmasawn a tel a ni.