Mizoram sawrkarin NEEPCO khin tum

Mizoram sawrkarin NEEPCO khin tum
Tuirial Hydro Electric Project power hmanna bill pangngai ni lo, supplementary bill NEEPCO-in thlatin Mizoram sawrkar a thin mek chungchangah dan bawhchhiatna a awm tiin, sawrkar hian khin a tum.
NEEPCO Ltd. in thlatin Tuirial HEP power hmanna bill pangngai ni lo, supplementary bill (shortfall energy bill) cheng vaibelchhe 102 Mizoram sawrkar a thing a. He bill hi NEEPCO hian 2019 April atanga March 2024 chhunga Tuirial HEP-in power a siamchhuah tur zat ruahmansa a siamchhuah theih loh avangin a rawn bill a ni. He bill tam tham tak lokal hi dan hnuaia ennawn tha leh turin chief minister Lalduhoma leh Power minister F Rodingliana ten lehkha bakah hmaihma ngeiah Union Power minister an sawipui tawh a. He thu kalzelah hian Ministry of Power chuan hemi chungchang liau liau sawi tur hian a kaihhnawih (stake holder) hrang hrang kumin September 24 khan Delhi-ah a lo kokhawm tawh a, Heti chung hian NEEPCO Ltd hnen atanga dawn shortfall bill hi power leina ba tihlanna PRAAPTI portal-ah a la chuan reng a ni.
Central Electricity Regulatory Commission (CERC) Regulation-a a inziah danin, kum khat chhung bill chu a kum lehah zel chauh an bill tur a nih laiin, NEEPCO hian kum 5 chhung bill a siam hi CERC Regulation bawhchhiatna nia hria in Mizoram sawrkar hian khin a tum a. Power minister ho hian Inrinni khan Finance department leh Law & Judicial department hotute nen an thukhawm.
Power lei leh hralh chungchanga thubuai hlabuai ngaihtuahtu CERC hnenah zualko nise, tiin rel a ni a. Hemi atana thil tulte chak tak buaipui nghal nise an ti. He harsatna hi CERC hnena thlen a nih chuan a vaia a ngaihhnathiam loh pawhin nasa takin a tih tlakhniam ngei beisei a ni. He shortfall bill hi khinlet a nih loh a, November thla chhung ngeia pek tlak a nih loh chuan CERC lam hian Mizoram a thunun/regulate dawn a, CERC-in a regulate chuan Mizoram sawrkarin power a hralh chhawn (power trading) khapsakin, thil dang tam takah a khuahkhirh dawn a ni.