George Strait-a’n CMA Willie Nelson Lifetime Achievement Award dawng dawn

Country Music Association (CMA) chief executive officer Sarah Trahern chuan, “George Strait anga Taxas leh country artist hi an tam lo hle a ni,” tiin 2024 CMA Willie Nelson LIfetime Achievement Award an hlan tur thu a puang.
58th CMA Awards hi November ni 20 hian Nashville-a Bridgestone Arena-ah an sem dawn a, hetah CMA Awards ngaihhlut entertainer of the year pawh tum thum lo dawng tawh George Strait hian lifetime achievement award a dawn bakah a pualin country star rual an perform dawn bawk a ni.
George Strait hi rimawi khawvelah kum 40 chuang a lo tal ve tawh a, hetih chhung hian multiplatinum album 33 nei tawhin, Billboard Hot Country Songs chart a No.1 kai thei hla 44 a nei tawh a, 1989, 1990 leh 2013-ah te CMA entertainer of the year niin, CMA Awards pawh 17 a dawng tawh a, CMA Awards nominations a lang ngun ber niin, nomination 83 a nei tling tawh a, Country Music Hall of Fame leh Texas Cowboy Hall of Fame-ah te lak luh a ni tawh bawk.
CMA Willie Nelson Lifetime Achievement Award hi country music-a chawimawina sang ber anga an neih niin, khawvel huapa country music tana thawhhlawk an nih mai bakah midangte tana inphal leh insengso nasa, concert performance ropui, streaming lama che tha, record sales lama chungnung tak te hnena hlan thin a ni a, he award hi Willie Nelson (2012), Kenny Rogers (2013), Johnny Cash (2015), Dolly Parton (2016), Kris Kristofferson (2019), Charley Pride (2020), Loretta Lynn (2021) leh Alan Jackson (2022) ten an lo dawng tawh.