National Press Day hmang
National Press Day 2024 chu Thawhtanni khan Mizoramah hman a ni.November 16 kha National Press Day a ni a, Mizoram Journalists’ Association leh Information & Public Relations department chuan kumtin he ni pual hian hun an hmang. Kuminah sawrkar chawlhah a tlak avangin Thawhtanni hian hman a ni.
Hmanpuitu I&PR minister Dr Vanlalthlana chuan technology-ah hmasawnna nasa tak awm mah se, journalist pawimawhna leh mawhphurhna a tlahniam chuang loa, chutihrualin, khawvel hmasawn zel leh thiamna thar mila intahhriam reng a ngai tih a sawi a ni.
Ram hmasawnna kawngah ram hruaitute remhriatna leh thawhrimna a pawimawh rualin, nawrkal turin ram mipui tuihalna leh rualawhna a pawimawh a. Mipui rilru sukthlek dan herrem tur leh khawvel tukverha dahchhuah tir a, hmasawnna kawnga tuihalna leh rualawhna dik an neih theihna’n journalist-ten mawhphurhna leh tih tur pawimawh an nei tih a sawi a. Thil chik, dil chhut leh chhuifiah kawngah tan la zel turin a chah.
MJA president C Lalrambuatsaiha pawhin, kum 20-30 liamtaa journalist-te news report dan leh an thulakna nena khaikhin chuan, tunlai internet khawvela chanchinthar lak zung zung tur awm tawh leh mitin maiin news report thei tawh mah se, thuchiang hriat leh mipui hnena thu rintlak pek kawngah journalist-te tan sauh sauh a tul tih a sawi a ni.
National Press Day denchhen hian Mizoram sawrkarin journalist pension scheme a duan thar chu I&PR minister hian a tlangzarh nghal a. Journalist pension mi 8 hnenah ‘pension book’ a hlan nghal.
National Press Day hmannaah hian I&PR director C Lalnunkima’n a kaihruai a, Mizoram University Department of Forestry ami Dr David C.Vanlalfakawma’n “Journalism in the face of environmental crisis” tih thupui hmangin kan chhehvel boruak, leilung, nungcha leh ramngaw chereu mekah journalist-te hma an lak a tul dan a sawizau a ni.
8 Mizoram Journalist Pension Scheme 2023 hi sawrkarin gazette kaltlangin 2023 October 5 khan a tichhuak.
8 He pension scheme hnuaiah hian India khua leh tui dik tak, Mizoram chhung mi leh sa, journalist hna kum 30 tal thawk tawh chuan kum 60 a tlin chuan ama duh thu angin journalist pension a dil thei a ni.
8 He scheme hnuaiah hian pensioner hian thlatin Rs. 8500 a la thei a ni.
8 A tumkhatnaah hian mi 8 – C Lalkhawliana (Highlander) Aizawl; C Dinthanga (Lelte) Aizawl; BK Renthlei (LPS) Aizawl; Sangthuama Royte (Hriatna) Aizawl; S Lalhmachhuana (Turnipui) Kolaisb; V Lallianzuala (Lairam) Lawngtlai; RC Hranghmingthanga (Zawlbuk Aw) Thenzawl Serchhip; K Thangvela (Zobawm), Tipa Siaha te an ni.