England leh Norway an kaisang

Pathianni zan khan UEFA Nations League 2023-24 khelh chhunzawm a ni a, League B atangin England leh Norway chu League A lamah an kaisang. England hian Wembley Stadium-a an mikhual Republic of Ireland chu 5-0 ngawtin an hneh. Erling Haaland hattrick siamna inkhelah Norway in an khingpui Kazakhstan chu 5-0 ngawtin an sawp ve bawk.
League A lamah kir leh turin England hian an mikhual Republic of Ireland an hneh ngei ngei a ngai a, an mualah chak ngei tumin tan an khawh nasa hle. An mikhual lakah khel tha viau mah se goal an thun thei lo reng a, tam zawk an nih hnuah goal nga lai an thun zui ta thung.
He inkhel hmuhnawm leh pawimawh takah hian Republic of Ireland player Liam Scales chu minute 51-naah hnawhchhuah a ni a, ani hian penalty a chawi bawk. He penalty hi captain Harry Kane chuan harsatna tawk lovin a pet goal a, minute 53-naah hmahruaina goal a thun. An mualah tam zawk an ni a, goal thun hmasa zawk an nih bawk vangin Three Lions an phur viau a, inrintawkna sang zawk nen an inlan chhunzawm. Lee Carsley team tan hian Anthony Gordon chuan minute 55-na lekah an goal hnihna a thun a. Gordon goal thun atanga minute thum hnu lekah Conor Gallagher chuan England goal thumna a thun a thun zui leh a, an hmahruaina a tizau.
Hun rei tak si thum faia hma an hruai huin hun tawp dawn hnaih lamah Three Lions in goal hnih an thun belh leh. Minute 76-naah Jarrod Bowen chuan an goal lina thunin an hmahruaina a tizau a. Minute 79-naah Taylor Harwood-Bellis chuan an goal ngana thunin a tawp a khar zui leh bawk. An mualah si nga faia an chak vangin England hian khelh 6 atangin point 15 an hmu a, Greece nen an point hmuh inzat bawk mah se head to head a tha zawk England hi League A lamah an kaisang. Season liam ta khan England hi a che chhe viau a, League B lamah an tlahniam. League B-ah kum khat hun an hman hnuin League A lamah an kaisan zui leh nghal. England an kaisan lai hian Group 2-a point hmu ve miah lo Finland chu League C lamah an tlahniam ve thung.
Wembley Stadium-ah Republic of Ireland an hmachawn hi manager lai lawk Lee Carsley-a’n England a enkawl hnuhnung ber tur a ni a. A hun hnunungah 5-0 ngawta hnehna an chang a, League A lamah an kaisan tel bawk hi Carsley tan pawh thil lawmawm tak a ni ngei ang. England hian an manager thar atan Thomas Tuchel an dawr fel tawh a. Manager thluak tha tak Tuchel hian January ni 1, 2025 atangin England national team a kaihruai tan ang.
England ang thoa chak mamawh Norway hian a group mawngphaha awm mek Kazakhstan an mikhual a, an mualah awlsam takin hnehna an chang. Norway tana goal thun hnem ber ni mek Erling Haaland chuan a record siam a tihzau zual zel a, goal nga ngawtin amah hnaih bertu a kalsan fel der tawh. Club leh tam tana goal thun thei tak Haaland hian minute 23-na lekah Kazakhstan lak Norway hmahruaina goal a thun. Haaland hian minute 37-naah an goal hnihna a thun bakah minute 71-naah an goal lina a thun zui leh a, inkhel pawimawh takah hattrick siamin an ram a chakpui. Haaland goal thum thun bakah Norway tan hian Alexander Sørloth leh Antonio Nusa ten goal khat ve ve an thun bawk.
Kazakhstan lakah point thum an hmu leh tak vangin Norway hian khelh 6 atangin point 13 an hmu a, Group 3-ah Group champion an niin League A lamah an kai sang. Norway hnuai chiaha awm Austria chuan pathianni zan khan an khingpui Slovenia chu an hneh zo lo a, point hnih hlu tak an hloh. Group 3 atang hian Norway an kaisang a, khelh ruk atanga point khat chiah hmu Kazakhstan chu League C lamah an tlahniam ve thung.