San Marino an kai sang

November 18, Thawhtan zan khan UEFA Nations League khelh chhunzawm a ni a, League D lamah San Marino chuan Mimualah hnehna an chang ve teh mial a, mak tak maiin League C lamah an kaisang.
San Marino hi Fifa ranking-ah 210 na lai an ni a, Fifa ranking a hniam ber an ni hial. Inkhel an hmachhawn tawh vawi 211 ah vawi 199 lai tlawm zawkah an tang a, an record a chhe tek tek hle. An record chhe viau mah se Nations League 2024-25-ah erawh an khel tha ve teh tlat a, League D, group 2-ah champion an ni ve teh tlat.
Tui let hnu lamah Mimuala hnehna la chang ngai reng reng lo San Marino hi Liechtenstein hmachhawn turin Rheinpark Stadion-ah an leng lut. An khingpuite hi an hnuaia awm an nih vangin an zuam ve riau a, hnehna chang turin an inringtawk hle. Group champion ni tura chak ngei ngei an mamawhna inkhelah hian goal chhuah hmasa zawkah an tang teh tlat thung. Liechtenstein hian table hnuai ber luah mek mah se an mikhual San Marino an hneh a nih chuan pahnihnaah an inhlangkai thei dawn thung a, an mualah chak ngei tumin tan an khawh ve bawk. Mualneitu tan hian Aron Sele chuan minute 40-naah hmahruaina goal a thun a, 1-0 a hmahruai chungin chawlhlawk an hmang.
Chawlhlawk hmain goal thun thei lo mah se chawlhlawk hnu lamah San Marino an khel tha ta viau thung. Second half tan atanga minute khatna lekah Lorenzo Lazzari chuan goal thunin an si phurh a sut. An si phurh an sut hnuin an khel tha zui viau a, Nicola Nanni chuan minute 66-naah penalty atangin hma an hruai letna goal a thun zui leh. Mimualah hmahruaitu zawk an nih vangin an phur viau a, hnehna chan ngei tumin thapui an thawh zui. Goal khata hma an hruai hnuin Alessandro Golinucci chuan minute 76-naah an goal thumna a thum zui leh ta mai a. Tui let hnu lamah a vawi khat nan Mimualah hnehna an chang a, record thar an siam ve ta hlawk a ni.
Liechtenstein an hneh nawlh vangin San Marino hian an chunga awm Gibraltar chu point khatin an lehpel chiah a, khelh li atanga point 7 hmuin group champion an ni. Mak tak maia group champion an nih nawlh vangin San Marino hi inelna sang zawk League C lamah an inlan zui thei dawn.