Jail tangten house wiring zir

Lunglei district bawrhsap R Lalthazuala hmalaknaa HDFC RSETI hnuaia District Jail Lungleia house wiring training buatsaih chu Ninngani khan additional DC Rochuangkimi Khenglawt chuan a hawng a. District Jail Lunglei-in Krismas leh kumthar an lawmna atan sumfai Rs. 20000 a hlan nghal.
District Jail superintendent Lalrampari, SDC chuan RSETI-in District Jail-ah training a buatsaih sak chu lawmawm a tih thu a sawi a. Tun mai ni lo, nakin zelah pawh trade hrang hrang – puanthui, computer hardware & software leh thiamthil dang training pawh la buatsaih tura ruahman a nih thu a sawi a ni.
District Jail Lungleia HDFC RSETI hnuaia house wiring training buatsaihah hian a bultanna atan training tur mi 34 thlan chhuah an ni a. An ni hi ni 30 chhung an training anga, an zir zawhah Ministry of Rural Development hnuai atangin NSQF qualified certificate hlan an nih dawn bakah HDFC atangin an bul tanna tur remchang ruahmansak an ni dawn a ni.