‘Community reserve’ ah Kawnpui rama ‘Zotlang Ngaw’ puang dawn

‘Community reserve’ ah Kawnpui
rama ‘Zotlang Ngaw’ puang dawn
Mizorama a hmasa ber ni turin Kawnpui ram chhunga Zotlang Ngaw chu sawrkarin ‘community reserve’ ah a puang dawn.
Mizoram State Board for Wildlife thutkhawm vawi 11-na Zirtawpnia chief minister Lalduhoma kaihhruaia neih chuan he thu hi a rel a. Mizorama a hmasa ber atan Kawnpui khaw hlui tlang, Kawnpui khawtlangin kum tam tak an lo humhalh tawh, ram hectare 620-a zau Zotlang Ngaw chu Wildlife (Protection) Act 1972 section 36 (c) dan angin ‘community reserve’ a puan an remti.
Ramsaten mihring ranvulh an tihhlum palha zangnadawmna pek tur sum, AH & Vety department-in a bithliah chu pawm a ni a. A taka kalpui theiha lo bawhzui turin AH & Vety hi mawhphurhna pek a ni.
Pukzing to Silsury kawngpui zauhna atan wildlife clearance pek chu Board hian a pawm a. National Board for Wildlife-a recommend tura tih a ni.
Thorangtlang Wildlife Sanctuary huamchhunga awm Dampui khua sawn chhuah (relocation) kalzelah zangnadawmna la dawng ve lo chhungkaw ruk hnenah a ranglama zangnadawmna pek ni se, an ti bawk.
Thutkhawmah hian EF&CC minister Lalthansanga, adviser to CM TBC Lalvenchhunga, MLA T Lalhlimpuia leh member dangte an tel a ni.