School kum 50 tlin lawm

School kum 50 tlin lawm
Govt. Middle School Ailawng chuan an kum 50 tlin, Golden Jubilee chu Zirtawpni khan an lawm a. Dampa bialtu MLA Lalrintluanga Sailo chuan a hmanpui.
An bialtu MLA ni tura an thlantlin tirha he bial tana a rualawhna leh a ngaihpawimawh ber chu zirna a ni tih Lalrintluanga Sailo hian a sawi a. A tir atanga theihtawp chhuahin term hmasaah higher secondary school panga an din hman a, middle school leh high school engemawzat an upgrade bawk tih a sawi.
“Duhtawk chin awm lo mah se, he biala zirna hmasawnna nasa tak avang hian ka lawm em em a, he school pawh hian hmasawnna tur tam tak a la nei ngei ang, hma a sawn zel theihna turin kan phak tawkah kan tang tlang zel ang,” a ti. School tualzawl PCC flooring-na tur a pe nghal a ni.
He school headmaster hmasa ber K Zoliana pawhin thu a sawi a. Ailawng Middle School hi kum 1974-a din niin, tunah hian zirlai 44 awmin, staff 11 an awm. A tirah mipui sum thawhkhawm hmanga din a ni a, kum 1994 khan sawrkarin la in Govt. M/S Ailawng tih a lo ni ta a ni.