Centre thawhpui thiam chuan sumah harsatna awm dawn lo

Centre thawhpui thiam chuan
sumah harsatna awm dawn lo
Mizoram sawrkarin sawrkar laipui a thawhpui thiam phawt chuan hmasawnna sum lamah harsatna a awm loh tur thu Union minister Gajendra Singh Sekhawat chuan a sawi.
BJP Mizoram State general secretary Lalthangmawii chuan Union Tourism minister Gajendra Singh Sekhawat hi New Delhi-a a office-ah hmu in, tourism lama Mizoram-in harsatna leh hmasawnna a neih dan tur a sawipui.
State-in tourism lama hma a sawn theihna tur sawipuiin, tourism hmanga eizawnna hna tam tak thalaite tan siam theih a nih dan tur, Mizoram chu tourism-ah sum tam tak lalut thei tur khawpa zinmite hip thei tam tak a awm tih a sawi a ni. India hmarchhak, a bikin Mizoram chu khualzin hipna hmun tha tamna leh tourism chu eizawnna tlaka buatsaih an tum tih Union Tourism minister hian BJP Mizoram hruaitu hi a lo hrilh a. State sawrkarin project mumal leh tha central-a a dil phawt chuan sawrkar laipuiin tanpui a inhuamin a inpeih reng tih a sawi. Sawrkar laipui puihna in hma tam tak lak a ni tawh na chungin, duhthu sam lohna erawh a tam avangin Mizoramah thawh tur a la tam tih a lo hrilh bawk.
State sawrkarin sawrkar laipui a thawhpui thiam phawt chuan sum leh paiah harsatna a awm lo tih Union minister hian a sawi a. BJP Mizoram general secretary hian Union minister hi Mizorama zin turin a sawm a ni.