MP-a hnam hnih intihbuainaah in 12 hal

MP-a hnam hnih intihbuainaah in 12 hal
Madhya Pradesh-a Guna district-ah hnam leh hnam inkara tharum thawhna thlengah chenna in 12 zet inhalsak a ni.
Panheti khua, Fatehgarh police station huang chhunga thil thlengah hian Bhil hnamten Banjara hnamte in an halsak a ni.
In hal hi Thawhlehni chhun, khaw mi tam zawk daia an lova an awm laia thleng a ni a, thi leh hliam awm lo mah se kang chhe hlut zawng erawh a sang hle a. In halsak tak Banjara mite hi chenna tur leh bungrua pawh engmah an chang hman lo a ni.
Hetiang thil a thleng tih an hriat hian police leh thuneitute an kal nghal a, boruak tha lo thleng zel tur an veng nghal.
Hnam hnih inkara buaina hi hun rei tak atang tawha Panheti khua, Bamori tehsil-a ram ngaw inchuhna atanga intan a ni a. Diwali lai khan hnam hnihte hi intibuai thar lehin mi pahnihin hliam an tuar nghe nghe.
Thawhtanni zan khan hliam pakhat zawk, Galsingh Bhil-a chu Indore-a enkawl a nih laiin a thi a. Hemi hnu, a tukah Bhil mite chuan phuba lak nan Banjara mite hi an bei ta a ni.
Khuaah hian dan leh thupek kengkawng turin police thahnem tak dah nghal an ni a. Gwalior IG Arvind Saxena chuan boruak lum zual an tidai tawh tih a sawi a, Superintendent of Police leh a team-in an awmchilh tih a sawi.
FIR pawh ziak lutin in haltu leh tharum thawhtute pawh chhui zui nghal mek an ni.
In halsak tak Banjara mite hian sorkar a inrawlh vat an phut a. Tual chhunga cheng dangte pawhin zangnadawmna pek leh chhawmdawlna pek an phutpui ve bawk a. An chenna tur siamsak an phut bawk.