Delhi boruak bawlhhlawh a la kiang hleithei lo

Delhi boruak bawlhhlawh a la kiang hleithei lo
India khawpui, Delhi boruak chu chhe tak a la ni zel a, AQI chu Nilaini chawhma dar 10:00 pawh khan 328 a la ni tih Central Pollution Control Board (CPCB) chuan a sawi.
Hetih lai hian Thawhlehni chawhnuah khan Skymet Weather Services Vice President Mahesh Palawat chuan darkar 24 hnuah boruak bawlhhlawh zual hretin ‘hlauhawm’ huangah a awm dawn tih news agency ANI a hrilh a; mahse, he chanchin ziah lai thleng hian a la thleng rih lo.
CPCB chuan Nilaini chawhmaa a tehnaah hian Shadipur chu AQI sanna ber niin 377 a ni a, a hniam ber, DTU-ah chuan 242 a ni thung a. IGI airport hnaihah chuan 300 leh Wazirpur-ah 330 a ni.
Nilaini zing hma takah khan chhum a tam hle niin ANI chuan a sawi a, a bikin India Gate velah tam zualin khaw hmuh theih chin pawh a tawi hle niin a tar lang.
CPCB chuan boruak him leh him loh vilna hmun 38 an neih zinga khawi mahin ‘hlauhawm’ huang an la thleng hlawm lo niin a sawi.
AQI 0-50 hi a ‘pangngai’ a ni a, 51-100 hi ‘la awm theihna’ a ni a, 101-200 hi ‘tha lo’ a ni a, 201-300 chu ‘chhia’ a ni a, 301-400 chu ‘chhe tak’ niin 401-500 chu ‘hlauhawm’ a ni.
Thawhtannia Commission for Air Quality Management (CAQM)-in thurawn a tihchhuahah chuan Delhi-a Directorate of Education-in NCR huam chhunga pawl 12 leh a hnuai lam chin zawng chu boruak bawlhhlawh zualpui a kian hma zawng sikul kai lova ral atanga zirtir ni se a ti.
Supreme Court pawhin November 25 khan Graded Response Action Plan (Stage 4) hnuaiah thupek chhuahin zirna in nghawng thei chin a ni.