MSCI-ah cancer zaina bun thar

MSCI-ah cancer zaina bun thar
Mizoram State Cancer Institute (MSCI) Zembawkah cancer natna neite zai theihna tur ‘surgical services’ bultanna – Operation Theatres Complex leh hemi in a kentel damlo 7 dah theihna ICU siam thar a ni.
A hawngtu Health minister Lalrinpuii chuan MSCI-ah inzai theihna leh ICU hawn a ni ta chu mipui harsa zawk tam tak, phai panna tur neiloten an chhawr tangkai theih dawn bakah Civil Hopsital Aizawl leh Zoram Medical Centre-a inzai ngai tam tak chu hetah hian an inzai thei tawh dawn tih a sawi.
MSCI-a surgery services din chu sawrkarin mut mawh hnar mawha neiin, cancer zai thei doctor MSCI-a thawkte puibawmtu tur nurse leh thawktu dah belh ni mah se, a tlem thei ang ber (bare minimum) chauh a ni chungin, Surgery Team hi din a ni tih a sawi bawk.
Primary health centre-ah damlo admit an tlem hle laiin, District Hospital ho erawh mipuiin kan bawr hle thung si a, rural health lamah tha thawhkhat mah ila, tertiary sector lam – specialist sector-ah chuan doctor leh tunlai hmanraw changkangah kan pachhe leh viau thung tih Health minister hian a sawi a. District Hospital leh damdawi in lian ho tihchangtlun zel leh thuamthat chu sawrkarin a ngaipawimawh tih a sawi a ni.
ZMC-a IVF, lung zaina – cardiothoracic surgery, thluak zaina – neurosurgery tan a nih theihnan kawng dap mek a ni, tiin, “Health services tihchangtlunnan CSR hman tangkai leh dap zel a pawimawh a, company tam takin health sector atan an thawk chak thin a, hengte hi kan dap zel a tul,” Lalrinpuii hian a ti.
MSCI-ah hian cancer zai thei doctor pathum (gynane onco surgeon, onco surgeon superspecialist leh head and neck onco surgeon) an awm awm tawh a, anmahni puitu anesthesiologist leh thawktu dang dah belhin surgery services hi tan a ni. Hemi in a mamawh leh kentel ICU khum 7 awmna siam a ni bawk. Operation Theatres Complex hnuaiah hian major OT pahnih leh minor OT pakhat a awm a. Hengte hi sawrkar laipui scheme ‘Tertiary Cancer Care Centre’ hnuaia din leh sak a ni.
MSCI-ah hian tunah doctor 16 an thawk a, chu’ng zing 13 chu a nghet niin, 3 chu NHM hnuai ami contractual an ni.