Sihhmui lei dawh rei an ti

Sairang leh Lengpui inkara YMA branch 8 chuan Sihhmui kai lei dawh chhung rei lutukin nunphung a tibuai chu siamthat thuai a nih loh chuan hma lak zui an tum.
Thudawn danin, Lengpui Airport kawng Sihhmui kaia Tlawng lei dawh mek avangin kawng khar chhung a rei tak deuh avangin a chhehvel khuaa YMA branch – Lengpui, Lengpui Model, Lengte, Nghalchawm, Sihhmui, Sairang, Sairang Dinthar leh West Serzawl chuan lei dawh mek hi December 10 thlenga zawh a la nih loh chuan hma lak an tum tih sawi a ni.
Lei dawh chhung atana ruahman lawk aia a rei tak deuh avang leh, mipui nawlpui veivahna leh mamawh lakna kawngah harsatna an tawh rei tak avangin December 10 thleng an nghak anga, hemi chhunga mipui nawlpui zawh theih tura zawh a nih loh chuan YMA-in hnatlanga tih tlang mai dan ngaihtuah tha an ti, tih thu dawn a ni.