Armed Forces Flag Day atan vehbur khawn tan

Armed Forces Flag Day
atan vehbur khawn tan
Ram tana nun hlan India sipaite zahna chibai buk Ni atana hman – Armed Forces Flag Day chu kumtinin December 7-a hman thin a ni a. He Ni pual hian Mizoram pumah tanpuina vehbur khawn mek a ni a, sum leh pai khawn tlingkhawm hian ex-servicemen leh an chhungte hrilselna kawnga inenkawlna mamawh leh khuarel chhiatna tuar tanpui ngaite puih an ni dawn.
Armed Forces Flag Day pual hian larsap Dr Hari Babu Kambhampati chuan thuchah siamin, mahni nun thapa ram leh hnam himna atana beitu sipai huaisente zahna chibai bukna atan he ni hi urhsun taka hman thin a ni tih sawiin, ‘Indian Armed Force-te hi kan ram leilung, tuipui leh van lam venghim tlattu an ni a. He ramin amaha inrelbawl tura dikna leh chanvo a neihte venghim turin an nunna hial pawh an hlan ngam a ni. Ram tana an inpekna hlu tak avang hian mipui vantlang hi ngaihngam takin kan mut theih phah thin,’ a ti.
Armed forces mi leh sa Mizoram fa hrin, tunhma lama ex-servicemen hriat hlawh leh hmingtha bakah 9th Legislative Assembly of Mizoramah Lt.Col. Clement Lalhmingthanga (rtd) leh petty officer TBC Lalvenchhunga (rtd) te chu MLA an ni tih a sawi a. India tana an inpekna leh hnathawh that vanga huaisen lawmman leh chawimawina dawngtute – naik subedar Jeremy Lalrinnunga, Guard Regiment – Commonwealth Games 2022 gold medalist & Vishist Seva medal dawngtu; naik Lalhmangaihsanga Chinzah, 1st Assam Regiment leh Major Laldingngheta, Madras Regiment te, ral hmaa huaisen taka a chet avanga Sena Medal (Gallantry) dawngtute leh sepoy H Lalrokima, 12 Assam Regiment, ral hmaa huaisen taka a chet avanga Mention-in-Despatch hlan an ni tih a sawi bawk.
‘An huaisen leh thiltih ropui tak avang hian heng sipai huaisen leh danglam bikte hnenah hian a vaiin Rs. 753000 pek a ni a. Heng mi hmingtha leh ngaihsan awmte hi infuihthar nana hmangin, armed forces zawm tura taksa leh rilru lama inbuatsaih turin Mizo thalaite ka chah a. Mizo thalaite theihna leh chakna ka hmuh hian armed forces hna zawmte pawhin hlawhtlinna changin hmingtha taka an rawn chhuah ngei ka ring tlat a ni,’ Dr Hari Babu Kambhampati hian a ti.
Armed Forces Flag Day puala vehbur khawn chu Mizoram mipuiin ngaipawimawh turin a ngen tih a sawi a. Ram chhantu sipai huaisente hrereng chung leh an kalsan tak chhungten inenkawlna tha an dawn theihnana ngaihtuahna seng a, inhawnga tanpuina pe turin a ngen tih larsap hian a sawi a ni.

Larsap thusawi dang:
* Sawrkar kum kalta leh kal mekah Mizoram sawrkar chuan indona avanga sipai thi chhungte hnenah leh ramtuileiloa chhuakte hnenah Rs. 12,50,000 a hlan.
* Sawrkar kum kalta leh kal mekah ex-servicemen leh an chhungte mi 30 hnenah a vaiin tanpuina Rs. 1,58,000 sem chhuah a ni.
* Sipai thuam inbelte laka kan bat hi hrenawn fo ila. Thil dang zawng aiin heng ram chhantu sipai huaisente hian kawng engkima tanpuina leh tawiawm mamawh ngawih ngawih an chhungte khawhar leh mangang taka awmte an kalsan tih hria ang u.
* Armed Forces Flag Day puala vehbur khawna sum leh pai tlingkhawm hmang hian ex-servicemen leh an chhungte hrilselna kawnga inenkawlna mamawh leh khuarel chhiatna tuar tanpui ngaite puih an ni dawn.