Hmarchhakte pualin inphochhuahna siam
Hmarchhakte pualin inphochhuahna siam
India hmarchhak puala buatsaih, Ashtalakshmi Mahotsav chu December 6-8 chhung khan New Delhi-ah neih a ni a. December 6 khan Prime minister Narendra Modi chuan hawngin, DoNER minister Jyotiraditya Scindia bakah hmarchhak state-a chief minister-te a hawnnaah hian an tel a, Sports & Youth Services minister Lalnghinglova Hmar chu Mizoram chief minister Lalduhoma aiawhin a tel.
Minister Lalnghinglova Hmar hian Mizoram leh hmarchhak state-te hmasawnna tur hrang hrang a sawi a. Sports bikah Khelo India Scheme kaltlanga sum hmuh thin chuan hmarchhak state mipui, infiamna ngaina takte mamawh a phuhru zo meuh lo, tiin, Prime minister kaihhruaina hnuaiah India-in Olympic 2036 thlen a dilnaah inbuatsaih a tul tih a sawi. “India sawrkarin Olympics thlenna tur sports infrastructure ropui leh changkang tak tak a din thei ngei ang, mah se, chu’ng infrastructure-ah te chuan tunge inel dawn, tih kan inzawh a ngai. India tan Olympics thlen chu zahthlaka a chan lohna turin tun atangin hma kan lak nghal char char a tul tawh a ni,” a ti. Hmasawnna tura rawtna a neihte a thlen nghal a ni.
India hmarchhakah sports talent a awm a, mumal taka investment kalpui a nih phawt chuan Olympics 2036-a India hlawhtlinna kawng sialtu pawimawh tak a ni thei tih Lalnghinglova Hmar chuan a sawi a. “North East-a sports hmasawn zelna atan Ministry of DoNER-in hmarchhak state-te special status dilsak thei se,” tiin rawtna a siam bawk.
DoNER minister chuan Mizoram Sports minister rawtna chu tha a tih thu sawiin, project tha tak nen amah dawr zui turin a hrilh a ni.
Ashtalakshmi Mahotsav-ah hian hmarchhak puala hun hman niin, state pariat atangin an thlai, pangpar leh thei thar chhuah hrang hrang leh kutthemthiamna hmanga an thil siamte pho chhuah a ni a, subject hrang hrangah mithiamte inrawnkhawm a nih bakah zai, lam, lemchan, fashion show leh hmarchhak pholanna tur thil hrang hrang entir a ni. Inrinni khan “Towards Prosperity: Catalysing North East’s Progress for a Viksit Bharat” tih thupui hmangin hmarchhak state-a chief minister-te nen sawiho a ni.
India hmarchhak MP-te sawm an nih angin Mizoram Lok Sabha MP Richard Vanlalhmangaiha pawh a hawnna inkhawmah hian a tel a; hmarchhak atanga sport lama mi hmingthate sawm an nih angin Jeje Lalpekhlua, MLA pawh a tel. Mizoram atangin zaithiam leh lamthiamte bakah kuthathawktu thei, thlai leh pangpar chingtute, kutthemthiamna lama eizawngte leh sawrkar mi pawimawh engemawzat an tel bawk.