An thutiam tihlawhtling turin sorkar duh
An thutiam tihlawhtling turin sorkar duh
Zirtawpni khan Congress party-in Bhavan-ah Political Session an hmang a, an president Lal Thanzara’n ZPM sorkar chu an thutiam tihlawhtling turin an duh tih a sawi.
“He enchhin sawrkar, kan ti ang an tih ti loa, kan ti loang an tih ti leh thin si chanchin hi sawi a ngai leh thin a. An ni chanchin sawi ngai leh thin hi a inthlahrunawm khawp mai a, amaherawhchu thusawi tur min supply-tu ber an ni lawi si. An pawnfen hi kan hlim san sak lutuk chuan, Zokhuaa kuthnathawktute hi kan tibeidawng lutuk ang tih pawh a hlauhawm. ZPM sawrkar hi Congress party-in kan duhsakna chu, an intiam ang hian kuthnathaktute thlai thar, an intiam ang ngei hian lei ngei se, sawhthing pawh lei ngei se, chumi hma chuan an sawrkar hi tla mai lo se, tih hi a ni,” a ti.
Tunhnaiah Power minister-in Tuirial Hydel Project chunghchangah engineer-te a dem thu a sawi bakah CM Political adviser chuan bomb darh vek a rawt thu ni awma an hriat thu MPCC president hian sawi chhawngin, “He thusawi hian department engineer, a bikin, pension tawhte a tihnual hle nia sawi a awm. Engineer-te hian agreement hi anmahni thuin an sign thei ngawt loa, department kaihnawih hrang hrangten an enfel a, chumi hnuah Law department-in an vett phawt loh chuan aggreement sign ngawt theih a ni lo,” a ti. Tender leh quotation chhuah loin Mizoram sawrkarin transformer an lei nia an hriat thu a sawi bawk.
Tunhnaiah vaibelchhe sarih man Power department vekah transformer chhia thlakna tur leina a awm tih Lal Thanzara hian a sawi a. Minister-in tender leh quotation chhuah loin direct-in Kolkatta ami manufacturer supply a pe, tia hrilhtu an awm thu a sawi. “Power minister hi mimal taka ka hmelhriat tha a ni a, a department chan chanchin hi a chhe zawnga sawi fo ka duh lo, ka ti a. A ni chuan MRT, Power department kudam Zuangtuiah sawn transformer a thlen teuh tawh thu a sawi a. Congress Thalai an va kal a, thla te an la a, a siamtu company hming pawh a lang a ni. Chuta chuang ngei ngei tur ISI mark a chuang lo,” tiin, minister hian a duhsak a, supply hna hi a pe a nih pawhin ISI mark chuang ngei, hmantlak an duh thu sawi se a duh tih a sawi a ni.