Fulham lakah Arsenal an chak zo lo

Pathianni zana English Premier League khelhah London club lian Arsenal an chak zo lova, Fulham nen 1-1 in an inhnehtawk. Fulham lakah an chak zawh loh vangin Arsenal hian Liverpool nen an inkar an tizim tam thei lo. Arsenal an chak zawh loh laiin Chelsea chuan mualneitu Tottenham an lehthal a, point thum hlu tak an hmu ve thung.
Arsenal hi Fulham hmachhawn turin Craven Cottage-ah an lenglut. An lenluhna mualah bul an tan tha lova goal chhuah hmasa zawkah an tang. An si phurh an sut hnuin chakna goal thun hman zet mah se VAR rawn a nih hnuin hnawl a ni thung a, Mimualah uiawm takin an chak zo lo. Fulham lakah an chak zawh loh vangin pahnihna Chelsea nen an inkarah point hnih a tlak zeh phah.
Hmahruaitu Liverpool nen an inkar tihniam leh zual tura chak mamawh Arsenal hian Craven Cottage ah bul an tan tha thawkhat a, na takin an khingpuite an nawr. Hlauhawm siamin, Fulham nawr na viau mah se nawr let an tuar lova goal chhuah hmasa zawkah an tang. Fulham hian an mikhual Arsenal hi fuh zetin an nawr tlang a, mawi taka an khingpui tlarhnung an thiah hnuin Raúl Jiménez chuan minute 11-naah hmahruaina goal a thun. Jimenez hian pet tha thawkhat viau mah se Arsenal si nghak David Raya tan dan theih tur niin a lang naa Raya hian a chhuah tlat thung.
Goal an chhuah hnuin Gunners hian na takin an khingpuite an nawr let a, ball chang tamin, goal an thun teuh thei viau bawk. An khingpuite nawr na viau mah se chawlhlawk hmain goal an thun thei lova, hnufual zawk ni chungin chawlhlawk an hman a ngai tho thung.
Chawlhlawk hmain goal thun thei lo mah se chawlhlawk hnu lamah Arsenal in goal an thun ta thuai thung. Arsenal tan hian defender Wiliam Saliba chuan minute 52-naah fuh zetin a tauh goal a, an si phurh sutna goal a thun. 1-1 a nih hnuin Arsenal in chak ngei tumin tan an khawh zui. Hun tawp dawn hnaihah Bukayo Saka chuan hnaite atanga tauh goal in hma an hruai letna goal a thun zet a. VAR hmanga ennawn a nih hnuin Saka goal hi hnawl a ni thung a, uiawm takin an chak zo ta lo a ni.
Fulham lakah chak zo lo mah se Arsenal hian pathumna an luah chhunzawmm. Pahnihnaa awm Chelsea in hnehna an chan vangin Gunners leh Blues inkarah hian point hnih a tla zep thar thung. Gunners lakah tlawm an pumpelh vangin Fulham hian table-ah hma an sawn hret a, 10-naah an awm mek. Fulham hnuaiah hian Tottenham leh Manchester United te an awm.
Chelsea in Spurs an lehthal
Pathianni zana inkhel ngaihven hlawh tak; London derby-ah Chelsea chuan si hnih an phurh hmasak zet hnuin Tottenham an lehthal a,, point thum hlu tak an hmu. Tottenham muala inkhelah mualneitu lamin bul an tan tha viau a, minute 11chhung lekin goal hnih an thun hman. Spurs hian bul tan tha viau mah se Chelsea er let an tuar lova, an mualah ngei tlawm zawkah an tang.
London derby-ah chak ngei tuma tan khawh Tottenham tan hian Dominic Solanke chuan minute 5-na lekah hmahruaina goal a thun. Hma takah goal an thun vangin an phurh a, goal pawh an thun belh leh thuai. Minute 11-na lekah Dejan Kulusevski chuan an goal hnihna a thun a, an hmahruaina a tizau. Hma takah goal hnih an thun vanagin Tottenham an phur viau a, an mualah an chak zui a rinawm hle nghe nghe.
Goal hnih chhuah zawn mah se Chelsea an buai lova, an zam hek lo. Minute 17-naah season kal meka khel tha tak Jadom Sancho chuan goal thunin an si phurh a sut. Minute 17 chhung lekin goal thum ngawt lut bawk mah se goal dang a luh belh har viau thung. Goal lut a awm belh theih loh reng hnuin Cole Palmer chuan minute 61-naah penalty atangin an goal hnihna thunin an si phurh a sut zo. An si phurh an sut zawh hnuin captain Enzo Fernández chuan minute 73-naah hma an hruai letna goal a thun. Hma an hruai let hnuin Chelsea an khel tha chhunzawm viau a, penalty an hlawhchhuak nawn leh. Minute 84-naah Palmer chuan penalty a pet goal nawn leh a si hnih ngawtin hma an hruai let der tawh.
Si hnih an phurh hnuin Tottenham in an si phurh sut a, tlawm pumpelh ngei tumin tan an khawh a, hun pek belh minute 90+6-ah Son Hueng-min chuan goal thunin an si phurh a sut then. Son goal thun vangin phur viau mah se Spurs hian an si phurh an sut zo thei tawh lova, an mualah uiawm takin an tlawm zui ta a ni.
Manager thar Enzo Maresca hnuaia khel tha tak Chelsea hian table-ah pahnihna an luah nghet a. London-a an elpui lian Tottenham erawh chuan khelh 15 atanga point 20 hmuin 11-na an luah ve thung.