Box office-ah record siamin ‘Moana 2’ a la No.1

Box office-ah record siamin ‘Moana 2’ a la No.1
Walt Disney Animation kutchhuak hit zet mai ‘Moana 2’ chu North American box office-ah No.1 a ni a, kar hnih chhung a zawnin a No.1 ta. Box office ranking hi weekend (Zirtawpni – Pathianni) chhunga US-a cinema hall ticket hralhna sum chevel atanga chutin siam thin a ni.
‘Moana 2’ hian tun weekend kalta khan US-ah cinema hall ticket hralhna atangin dollar maktaduai 52 a la lut leh a, Thanksgiving zawh hnua weekend awm leh hmasa bera US-ah cinema hall ticket hralhna atanga sum la lut tam thei ber record a siam. A hmaa hetiang record siamtu chu ‘Frozen II’ kha niin, dollar maktaduai 35.1 a la lut thei ve thung.
Moana 2 hi US pawn lamah pawh a la chetha hle a, dollar maktaduai 103.4 la lut lehin, US pawna a lak luh zawng zawng hi dollar maktaduai 300 a tling tawh a, tihian ni 10 chhung lekin khawvel huapin dollar maktaduai 600 a la lut tling der tawh a, kumina film tlangzarhah chuan sum la lut tam pangana a ni pha der tawh.
‘Wicked’ pawh a la kaltluang viau a, an tlangzarh atanga weekend vawi thumnaah US-ah dollar maktaduai 35 la lut lehin No.2-ah bawk a awm leh a, tihian kar thum chhungin US-ah dollar maktaduai 320.5 a la lut tling tawh a, US pawnah dollar maktaduai 135 la lut tawh bawkin, a vaiin dollar maktaduai 455.5 a la lut ta.
Gladiator II pawhin dollar maktaduai 12 la lut lehin No.3 a la ni a, he film hian US-ah dollar maktaduai 133.7 la lut tling ve tawh bawk.
Kuminah Hollywood sum chevelin beisei a pha lo a, 2023-ah kum tluana Hollywood sum che velin dollar tluklehdingawn 9 a kai phak laiin kuminah tluklehdingawn 8 pawh kai pha dawn lo anga an chhut laiin Gladiator II, Moana 2 leh Wicked te kum tawp lamah an rawn chetha ta a, tuna chuan kumina North America-a cinema hall ticket hralhna pawh dollar tluklehdingawn 8.6 vel tling turin an chhut leh tawh a ni.