Kuminah heroin man hnem tawh

Ruihhlo hlauhawm heroin man tur a awm reng a ni ber a, man loh pawh a tam ang tih a chiang. Heroin hi a hluar a, Aizawl khawpui lun lai hmun hrang hrangah hian heroin hluarzia chu a hmuh theih.
Mizoram Excise & Narcotics (MEN) department-in kuminah November thla thleng khan heroin hi kg 44.650 an man tawh a, thla sawmpakhat chhunga an man hi a tam tham hle.
Nikum khan heroin hi kg 79.359 an man a, 2023 hi an man tam ber kum a ni. 2023 tih lohah chuan kumin hi an man tam kum a ni leh a, 2023 tih loh kum dangah kumin thla sawmpakhat chhunga an man ang zat hi an man ngai lo. 2023 tih loh kum dangah kg 40 an man tling ngai lo. September thleng khan kuminah kg 37.075 an man a, thla kaw chhunga khati zat an man khan, 2024 hi nikum tih lohva an man tam ber kum a ni tawh bawk.
Heroin hluarzia hi Aizawl khawlaiah a lang thei a, chhun pachangah pawh hmun lun laiah heroin leh a sulhnu hi a hmuh theih. A zuar leh a leitu an ngampa tih hi hai rual a ni lo a, hmun thenkhatah chuan chhun pachangah inchiu mawlh mawlh lai hmuh tur a awm deuh reng bawk.
MEN department hotute chuan khaw dang atanga heroin ngaihvena Aizawla kal, heroin buaipuia khawlaia tal nileng, zanah pawh thlen ina haw chuang lo an awm teuh tih an sawi.
Heroin hi a tam a, mahse a man a tlawm chuang lo a ni awm e. Thu dawn danin, kum hmasa lam aiin kumin hian a man hi a to zawk.
MEN department hian 2019-ah khan kg 12.596 an man a, hei hi kum khat chhunga kg 10 an man tlin hmasak ber a ni. Hemi hnu hian a pung ta zel a, 2022-ah khan kg 33.418 an man a, hei hi kg 30 an man tlin vawi khatna a ni. Nikumah a zuanin a zuang a ni ber a, kuminah thla sawmpakhat chhungin an man tam hle bawk.