A duh tan rooftop solar neih theih Kumthar lamah electric smart meter

Sawrkar laipui ruahmanna zing ami, mimal chennaa nizung chakna hmanga anmahni hman tur kawlphetha lak theihna chu tunah hian tih theih a ni mek a, ti tawh pawh an awm nual. Hetihlai hian mahni mamawh tawk kawlphetha lei theihna tur kalpui tum mek kumthar lam atanga bawhzui tan tum a ni. Power & Electricity minister F Rodingliana sawi danin, PM-Surya Ghar Muft Bijli Yojana (PM-SGMBY) hnuaiah mipui tan an inchunga nizung chakna atanga kawlphetha lak theihna bun dan duan a ni a. Hei hi eng chhit man an chawi tlem zawkna atana tih a ni.
He scheme-in a tum ber chu, mimal in vaibelchhe khat hnenah sawrkar laipui atanga tanpuina hmangin rooftop solar system pek a ni, tiin, mipuiin eng chhit man an chawi tlem danna atana duan a ni a. Sawrkarin hmundang atanga kawlphetha a lei tih tlemna tur leh mitinte intodelh zawka an awm theihnana tih a a nih thu a sawi.
He scheme hnuaia mahni inchunga solar panel bun duh chu India rama cheng, electric consumer ni mek leh bill pe thin an ni tur a ni tih minister hian a sawi a. Chenna in nei ngei an ni tur a ni a, sawrkar building leh pawl anga building awm chu a huam lo tih sawiin, diltu hming leh electric bill hming putu chu a inang tur a ni tih a sawi bawk.
He scheme hnuaiah hian solar system vuah leh a kaihhnawih buaipui turin vendor 12 chu sawrkarin a inthlunzawm pui tawh a. National bank hrang hrangin he scheme hnuaiah solar system bunna atan consumer-te loan an pe thei tih sawiin, bank account an neihna tlanglawn SBI leh MRB ah loan an pe thei a; Aizawl Municipal huamchhung leh AMC pawn lama km.200-a hlaa cheng tan a dang thung.
Electric smart meter hman tumnaah sawrkar chu inpeih thawkhat tawh mah se, a buaipuitu tur company nen kumthar lama bul tan tumin an inruahman tih P&E minister hian a sawi.
Vendor duh duhna berah inziahluh theih a ni a, tunah mi 2990 inziaklut tawhin, dilna 557 pawm a ni tawh tih an sawi a ni.
He scheme hnuaia rooftop solar kilowatt 10 thleng bun duh consumer chuan state portal – pmsuryaghar.mizoram.gov.in a inziah luh hnuah national portal – pmsuryaghar.gov.in ah inziahluh leh tur a ni. Online hmanga a tul ang tihfel hnuah consumer-ten solar bun tura sawrkarin a pawm vendor atangin mahni ina bun theitu thlan tur a ni.
Smart meter-ah hian meter-a electric current leh chhuak zawng zawng a chhinchhiah thei vek dawn a. P&E lam chuan hei hian electric current-a hman dan a tichiang thei dawn tih sawi a ni. Electric bill hi pre-paid a pek theih turin ruahman a ni a, Rs.100 chu pek lawk theih hniam ber tura tintuah a ni.