Karol G leh Shakira ‘TQG’ a lar ber

Karol G leh Shakira ‘TQG’ a lar ber
Karol G leh Shakira te hla thar ‘TQG’ chu Billboard Global 200 chart-ah a No.1 a, heng Colombian singer te hian Global 200 chart-a No.1 kai thei hla an neih vawi khatna ve ve a ni. Hetihrual hian The Weeknd leh Ariana Grande te pawh No.2-ah a invawrh ve leh ta bawk.
Billboard Global 200 chart hi kar khat chhunga khawvel huapa hla lar dan tehna niin chart ranking siam nan khawvel ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
Karol G leh Shakira ‘TQG’ hi khawvel huapin kar khat chhungin stream maktaduai 158.4 leh download sales 10,000 a tling a, hei hi Billboard Global 200 chart-ah a No.1 pui ta a ni. He hla hi Karol G No.1 album ‘Mañana Será Bonito’ a hla niin, a album pawh hi hmeichhe zaithiam zinga Spanish hla hlang awmna album Billboard 200 (albums) chart-a No.1 kaipui thei hmasa ber a ni bawk.
Karol G tan Global 200 chart-a No.1 kai thei hla a neih vawi khatna a ni a, he chart-a top 10 kai thei hla pali a neihna a ni bawk. Shakira tan pawh he chart-a No.1 kai thei hla a neih vawi khatna niin, chart top 10-a lang thei hla pahnih a neihna a ni bawk. An pahnih hian Colombian ve ve niin, Colombian singer zinga he chart-a No.1 thei pathumna an ni.
The Weeknd leh Ariana Grande ‘Die for You’ chu stream maktaduai 109.1 leh download sales 15,000 tlingin No.19 atangin No.2-ah a invawrh a, he hla hi The Weeknd solo album 2016-a tlangzarh ‘Starboy’ album ami niin, tunhnaiah TikTok-ah a lar tha a, Grande remix an tichhuak thar bawk nena, streaming a invawrh thar leh ta a ni.
The Weeknd hian he chart top 10-a lang thei hla pakua a nei tling ta a, Ariana Grande tan a pangana niin, an pahniha zaidunna, chart top 10 a lang thei pahnih a ni bawk. An pahniha zai dunna ‘Save Your Tears’ chu 2021 khan chart No.1 a lo kai tawh bawk a ni.
Chart No.1 hlui Miley Cyrus ‘Flowers’ chu kar ruk a No.1 hnuah No.3-ah a tawlh ta a, chart No.1 hlui bawk SZA ‘Kill Bill’ chu No.2 atangin No.4-ah a tawlh a, PinkPantheress leh Ice Spice ‘Boy’s a Liar Pt.2′ chu No.3 atangin No.5-ah a tawlh ta bawk.
Billboard Global 200 Top 10
1 TQG – Karol G x Shakira
2 Die For You – The Weeknd & Ariana Grande
3 Flowers – Miley Cyrus
4 Kill Bill – SZA
5 Boy’s A Liar, Pt. 2 – PinkPantheress & Ice Spice
6 Calm Down – Rema & Selena Gomez
7 Bzrp Music Sessions, Vol. 53 – Bizarrap & Shakira
8 Unholy – Sam Smith & Kim Petras
9 Creepin’ – Metro Boomin, The Weeknd & 21 Savage
10 Last Night – Morgan Wallen