2027 Asian Cup khel tura India hmabak a ko!
Nakkum March ni 25 atanga khelh tan tur 2027 Asian Cup Qualifiers final round draw tarchhuah takah India chu Bangladesh, Hong Kong leh Singapore-te nen Group C-ah an awmho a, Bangladesh mikhual chungin bul an tan ang.
A zawna vawithum qualify an tumna kal mekah world number 127-na luah mektu India hi an group-ah rau rau Fifa leh Asia ranking-a sang ber niin, an tumpui tur Hong Kong (156), Singapore (161) leh Bangladesh (185)-te ai hian sang bawk mah se group champion an ni ngei dawn em a hriat loh a, India tana team khawng tak tak vek an ni!
Blue Tigers hian tunhnaiah Group C team dang pathumte hi hmachhawn vekin, Bangladesh nena an insut hnuhnungber 2021 SAFF Championship-ah khan 1-1-in aninhnehtawk a; June 2022 khan Kolkata khuaa AFC Asian Cup Qualifiers-ah sili faia Hong Kong nehin, Singapore nena an insut hnuhnungber chu September 2022 kha niin, Vietnam rama Hung Thinh Friendly Tournament-a 1-1 draw bak an pel zo lo.
2027 Asian Cup Qualifiers final round draw a hriat rualin India head coach Manolo Marquez chuan an group chu a awlsam dawn lo tih a sawichhuak nghal a, ranking lamah inthlau tho mah se group chhunga mite inkarah danglamna a tam lo tih a sawi.
Spanish coach Marquez chuan, “Hong Kong hian player an nei tha a, an coach Ashley Westwood-a hnuaiah hma an sawn a; March thlaa kan tum hmasakber tur Bangladesh pawh hi SAFF Championship lama kan sut than niin, calendar kan hre ta a, game ruk khelh tur kanneih hmang hian Asian Cup khel tura kan tlang ngei a ngai,” a ti.
Malaysia khawpui Kuala Lumpur-a Asian Football Confederation (AFC) House atangin draw hi tihchhuah a ni a; ram 24 inlan turte chu group parukah team pali zela thenin, group winner-te chauhin Saudi Arabia rama kum 2027-a khelh tur tournament an hmachhawn thei dawn a, anni bakah hian qualifying second round khelh zawh ruala inhlangkai fel tawh team dang 18-in Asia khawmualpui huap tournament lian ber hi an khel bawk dawn a ni.
Qualifying final round hi March ni 25, 2025 atanga March ni 31, 2026 chungin an khel dawn a, team tinin home-and-away format hmangin match ruk diat diat an khel ang.
-- Advertisement --
India fixture
March 25, 2025 : India vs Bangladesh (home)
June 10, 2025 : Hong Kong vs India (away)
October 9, 2025 : India vs Singapore (home)
October 14, 2025 : Singapore vs India (away)
November 18, 2025 : Bangladesh vs India (away)
March 31, 2026 : India vs Hong Kong (home)