Tabla maestro Zakir Hussain a thi

Tabla maestro Zakir Hussain a thi
Vai khuang kan tih mai thin, tabla ben thiam hmingthang Zakir Hussain, kum 73, chu San Francisco, US-a damdawi inah a thi tih nimin khan a chhungten an puang. Zakir Hussain hi idiopathic pulmonary fibrosis (chuap ro ti ila a dik mai awm e) avanga inenkawl lai a ni a, he natna hi a thihpui ta a ni. Damdawi inah hian kar hnih vel awmin, zual lam a pan tak zel avangin ICU-ah dah a ni a, San Francisco sana-a Pathianni tlai lam dar 4 (keini tana Thawhtanni zing dar 6 vel) khan mual a liam ta a ni. A vanglaia tabla ben thiam ber te zinga chhal thin, Zakir Hussain hian a nupui Antonia Minnecola leh an fanu te pahnih- Anisa Qureshi leh Isabella Qureshi te a kalsan a ni.
Zakir Hussain hi rimawi khawvelah kum 60 vel a inhmang hman a, Indian artist mai bakah khawvel huap artist hriathlawh te pawh a lo thawhpui tawh a, 1973-a sap guitarist John McLaughlin, violinist L Shankar leh percussionist TH ‘Bikky’ Vanayakram te nen Indian classical music leh jazz la kawpa rimawi chithar an rawn tihchhuah kha khawvelin a hmelhriat tan tak takna a ni. Mipa naupang kum sarih mi lek a nih lai atangin tabla a tum thiam hle tawh a, Indian artist ropui Ravi Shankar, Ali Akbar Khan leh Shivkumar Sharma te pawh a lo thawhpui vek tawh a ni.
Western musician te pawh a thawhpui nual taw a, Yo-Yo Ma, Charles Lloyd, Bela Fleck, Edgar Meyer, Mickey Hart leh George Harrison te a thawhpuina chuan Indian classical music chu khawvel huapin a chawi lar a, global cultural ambassador an tihial a ni.
Zakir Hussain hian Grammy Awards pawh pali a dawng tawh a, 1988 khan Padma Shri hlan a ni a, 2002-ah Padma Bhusan leh 2023-ah Padma Vibhushan te hlan a ni tawh bawk.