Department pahnih hnathawh thlirlet

Department pahnih hnathawh thlirlet
Minister B Lalchhanzova enkawl department hnathawh chu Ningani khan chief minister Lalduhoma hoin thlirlet a ni.
Hnathawh thlirlet chu thil dik lo zawng tura buatsaih an ni loa, harsatna leh mamawh, chak leh tha zawka hna thawh theihnana inrawnkhawmna a ni zawk tih chief minister hian a sawi. Supply department leh Revenue department hna chu a hautak a, a pawimawh si a, thawktute pawh inpe taka thawk turin an beisei tih a sawi.
Supply lam hian ration card dik leh rintlak tak neih tum ula, sawrkar document pawimawh takah chantir kan duh. Review meeting minute hi in bawhzui tha em, tih kan ngaihven leh dawn a, kan thil sawiho tha takin in bawhzui dawn nia,” a ti.
Food, Civil Supplies & Consumers Affairs director Saizikpuii chuan an hnathawh a sawifiah a. Monsoon stock tha taka kalpui a nih avangin kuminah ruahtui tla tamin rei mah se, ration buhfaiah buaina a thleng lo tih a sawi a. Nakkum monsoon stock tur chu January atanga kalpui tan leh tur a ni tih a sawi.
Food Corporation of India-in hun rei tak chhung state sawrkar a bat sak tawh, Hill State Transport Subsidy cheng vaibelchhe 26 chu a theih anga a bawhzui tur thu chief minister hian a sawi a ni.
Land Revenue & Settlement secretary Vanlalmawia chuan an hnathawh sawifiah ve thung a. Mizoram pum hmun thuma thena hmun khat pawh survey a la ni loa, land registration hi state dangte sum hnar lian tak a nih angin, Mizoram sum hnar lian taka chantir tum ve mek a ni tih a sawi.
Cadastral survey kalpui a nih hmaa survey neih tawhna ram chu cadastral survey neih nawn leh vek a ngai a. Aizawl, Lunglei, Champhai leh Serchhip district resurvey tawh niin, Kolasib, Mamit leh Saitual resurvey fund an nghak mek tih a sawi bawk.