Good Governance Week tan

Good Governance Week tan
Sawrkar laipui ruahman anga December 19-24 chhunga Good Governance Week hman tur leh ‘Prashashan Gaon Ki Ore Campaign’ kalpui tur chu Ningani khan Lunglei district tan district bawrhsap Navneet Mann chuan a hawng. Hemi pual hian BDO office Lungleiah mipuiin harsatna an thlenna tur leh an mamawhnaa awlsam zawka sawrkar an dawr theihna tur buatsaih a ni.
Bawrhsap chuan sawrkar chu mipui tana awm a ni a, sawrkar hnathawkte pawh mipui rawngbawl tura rawih an ni, tiin, ram hmasawnna a awm theihnan sawrkar inrelbawlna tha a awm a pawimawh tih a sawi. Sawrkar hnathawkte chu an thawhsak mipui tan dawr nuam leh tanpuitu nih tum zel turin a chah.
Good Governance Week hi December 25 – ‘Good Governance Day’ behchhana ruahman niin, tun tum hian thingtlang mipui lam hawia hmalakna nasa zawk kalpui tum a ni a. Lunglei district-a bultanna atan Ningani khan BDO office-ah sawrkar department hrang hrang chuan awlsam zawka mipuiin anmahni an dawr theihna tur hawngin, mipuiin an harsatna an thlenna, Aadhaar inziahluh leh siamthat, mipui hamthatna scheme hrang hranga inziahluh leh a thlawna hriselna dinhmun endik buatsaih a ni.
Mamitah pawh Good Governance Week 2024 (Prashasan Gaon Ki Ore) hi Nngani khan district bawrhsap K Laltlawmlova’n a hawng a. Mamit district-a DC office bakah RD Block-ah pawh hman tur niin, week chhunga ruahmanna awmte tihlawhtling turin a chah.