Hla phuahtute’n Bethlehem lam hawi

Mizote tan Krismas hi zai nen a inzawm thuk a, ‘ber’ thlaah chuan hmun hrang hrangah Krismas hla a ri chuah chuah tawh thin.
Mizo Krismas hlate hian ngaihsan a hlawh a, thu leh hla lam ti mite pawhin an ngaisangin an dah sang. Mizo writer-te hian hnam dang Krismas hla aiin Mizote Krismas hlate hi a sang zawkin an ring tiin a sawi theih ang.
Krismas hla phuahtu hriat hlawhte zinga mi V Thangzama chuan “Kan Mizo Krismas hla hi a ropui ka ti a, hnam dang Krismas hla aiin a ropui zawk ang,” a ti.
“Kan Krismas hla phuahtute hian Isua chibai an buk, Bethlehem khaw lam an hawi,” a ti bawk.
Mizo Writers Association president R Lallianzuala pawhin “Kan Krismas hlate hi a tha em em. Hetiang tluka sang hi Hindi leh English-in a awm pawh ka ring lo,” a ti.
“Mihringin chatuan Pathian thuthlung kan bawhchhia a, Pathian leh mihring inrem nan Krismas a lo awm tih hi Mizo Krismas hlaah hian a lang a, a thu hi a thuk a ni,” a ti a, Mizo Krismas hlaah theology thuk tak a awm tih a sawi.
Mizo Krismas hla phuahtute chu Pathianin a hmang tiin a sawi a, “ Kan Krismas hlate hi Pathianin a phuahtuteah a dah a ni, thlarauvin a hmuhtir,” a ti.
V Thangzama chuan Mizo Krismas hlain Bethlehem khua a hawi thu a sawi a, “Bethlehem khua ni ve ila tih theih rum rum khawpte a ni,” a ti a, Mizo Krismas hla a ril thu sawiin, Kamlala leh Ralngama a dah san ber thu a sawi.