NBA record thar siamtu LeBron James

NBA record thar siamtu LeBron James
Sacramento Kings laka Los Angeles Lakers a chakpui rualin kum 39-a upa LeBron James chuan nimin khan NBA history-a minute khel hnem ber record thar a siam a, minute 57,447 khel tling chungin Kareem Abdul-Jabbar-a record lo siam tawh a khum.
|um li ngawt NBA champion ni tawh American mihang James hian kumin kumtir lam khan Abdul-Jabbar bawkin NBA all-time scoring record a lo siam tawh a chhuhsak a, tunah record ropui dangah a hmakhalh leh ta a ni.
113-100-a Los Angeles Lakers chakna inkhelah LeBron James hian point 19 hmuin, a team-mate Austin Reaves chuan point 25 a thawkchhuak ve bawk.
NBA history thar a siam hnuah James chuan a hnaa a inpumpekna rahchhuah a nih thu leh he game a hmangaihnain a hrinchhuah niin a sawi.
Nimin inkhel dangah 101-94-a Toronto Raptors an hnehna game-ah mipui lam hawia ball a vawm vak avangin Brooklyn Nets centre Nic Claxton chu court atanga chhuahtir a ni.
Zach LaVine chuan season kal laia a score hnem ber hun tawngin point 36 nen Chicago Bulls chu defending champion Boston Celtics lakah 117-108 hnehna a chanpui ve bawk a, a zawna Bulls vawithum chakna a ni ta.
French star Victor Wembanyama pawhin point 42 zet score chungin San Antonio Spurs chu 133-126-in Atlanta Hawks lakah hnehna a chanpui a; Shai Gilgeous-Alexander-a point 35 hmangin Oklahoma City Thunder pawhin Orlando Magic lakah 105-99 hnehna an sualchhuak.
Zirtawpni inkhel dangah Memphis Grizzlies, New York Knicks leh Houston Rockets-te an chak ve bawk.