Sabalenka kutah Brisbane title

Sabalenka kutah Brisbane title
A career-a a title 18-na thawkchhuakin world number one Aryna Sabalenka chuan Brisbane International final-ah nimin khan 4-6 6-3 6-2-in world number 107 Polina Kudermetova a hneh a, Brisbane khawpuiah trophy hum chungin kum bul a tan.
Belarusian tan Australian Open title humhim tura inbuatsaihna a kalpui mekah Russian qualifier Kudermetova kha fiahna a tling ve hman thuak a, set khatna a hloh a, mahse, set hnuhnung pahnihah erawh kum 26 mi Sabalenka chuan harsatna lian a tawp zui ta lo.
Nikum Brisbane final-ah khan Sabalenka hian Elena Rybakina a hneh lo a, mahse, a hnu lawkah kum khat chhunga grand slam tournament hmasaber khelin, Australian Open-ah a title kawl lai a humhim.
Kumin Australian Open hi Melbourne Park-ah kartawp Pathianni, January ni 12 khian khelh tan a ni ang.
Australia leilunga Sabalenka a champion mek laiin New Zealand ram lamah Naomi Osaka chuan Auckland Classic final a khel ve bawk a, mahse, Japanese erawh a vanduai a, dulthuar na avangin final a khel tluan thei lo a, trophy nen season thar bul a tan thei ta lo.
Grand Slam title pali la tling ve tawh Osaka kha kum 2023 laihawla a fa hming koh a hrin hnuin thla 15 zet tennis atangin a kalbo zet a, nikumah khelmual lut leh tanin, tun kha kum thum chhunga WTA final a khelh leh vawikhatna niin, Denmark nula Clara Tauson lakah 6-4-in set hmasaber a la a, a hnu lamah harsatnain a tlakbuak zui ta a ni.
Kum 27 mi hi a dulthuar na avangin a physio-in a enkawl a, medical timeout lain khelh chhunzawm hram dan han zawng ngial mah se a trainer nen an inbiakrawn hnuah khel chhunzawm thei dinhmunah dingin a inngai ta lo a, Tauson nen an inchibai ta a; Denmark player tan a career-a title pathumna a hmin phah a, kum 2021 hnu lama a champion leh vawikhatna a ni nghal bawk.
He tih mek lai hian Wimbledon champion Barbora Krejcikova chuan a hnungzang na a la damchian loh avangin Australian Open a khel thei dawn lo tih a puang.